Արեւմուտքի Կողմէ Սուրիան Հարուածելու Ժամկէտը Վա՞ղն Է. Մոալլեմ. «Համոզուած Չեմ, Որ
Միացեալ Նահանգներու Կողմէ Ռազմական Հարուածը Տեղի Պիտի Ունենայ»
Սուրիոյ արտաքին գործոց նախարար Ուալիտ Մոալլեմ երէկ տրուած մամլոյ ասուլիսի մը ընթացքին
յայտնեց, որ Ղութա Շարքիյայի մէջ քիմիական զէնքի օգտագործման յաջորդ օրը 2.5 տարուան
խզումէ ետք հեռաձայնային «բարեկամական» հաղորդակցութիւն մը ունեցած է Միացեալ Նահանգներու
արտաքին գործոց նախարար Ճոն Քերրիի հետ: Վերջինս իրմէ խնդրած է ՄԱԿ-ի հետաքննիչներուն
արտօնել Ղութա Շարքիյա այցելել, իսկ ինք յայտնած է, որ «ճշմարտութեան բացայայտումը մեր
ազգային շահերէն կը բխի, եւ աշխատանք պիտի տանիմ այդ հարցին մէջ սուրիական շահը գործադրելու»:Ան Արեւմուտքը զգուշացուց` յայտնելով, որ եթէ կ՛ուզեն Սուրիոյ դէմ յարձակում գործել, ապա քիմիական զէնքի օգտագործման պատրուակը անհամ ու անճիշդ է` աւելցնելով, որ «Սուրիա դիւրին պատառ մը չէ, եւ ինքնապաշտպանութեան միջոցներով ուրիշները անակնկալի պիտի մատնենք», սակայն աւելցուց, որ «համոզուած չեմ, որ հարուածը տեղի պիտի ունենայ»:
Սուրիոյ դիւանագիտութեան պետը նշեց, որ շրջանին մէջ շարժող որեւէ բան պէտք է ի շահ Իսրայէլի ըլլայ, ուստի այդ յարձակումը Իսրայէլի եւ Քայիտայի առնչուած Ժապհաթ Նուսրայի շահերուն կը ծառայէ` աւելցնելով, որ «եթէ կը կարծեն, որ այդ հարուածը Ղութայի մէջ զինուորական ջանքին վրայ պիտի ազդէ, ապա կը սխալին»:
Ինչ կը վերաբերի Ռուսիոյ արտաքին գործոց նախարար Սերկէյ Լաւրովի այն յայտարարութեան, թէ արեւմտեան զինուորական միջամտութեան պարագային Ռուսիա պատերազմին պիտի չմիանայ, ապա Մոալլեմ ըսաւ, որ «Ռուսիա Սուրիան չլքեց, եւ շնորհակալութիւն կը յայտնենք անոր կեցուածքներուն համար»:
| All the contents on this site are copyrighted ©. |