Патрыярх Лахам: вайсковая інтэрвенцыя ў Сірыю прынясе новыя ахвяры
Жорстка асудзіў планы
ЗША адносна вайсковага ўмяшальніцтва ў сірыйскі канфлікт грэка-каталіцкі Патрыярх
Антыёхіі і Блізкага Усходу Грыгорый ІІІ Лахам. У інтэрв’ю агенцтву “Asianews” іерарх
адзначыў, што “калі заходнія краіны хочуць стварыць сапраўдную дэмакратыю павінны
рабіць гэта на аснове прымірэння, дыялога паміж хрысціянамі і мусульманамі, а не з
дапамогай зброі”. Напад, які плануецца некаторымі заходнімі дзяржавамі Патрыярх назваў
“злачынствам”, якое прынясе новыя ахвяры ў дадатак да тысяч тых, якія ўжо маем за
два гады вайны. “Гэта разбурыць давер арабскага свету да заходняга свету”, - сказаў
ён. Ва ўсіх парафіях Сірыі іерархам быў распаўсюджаны тэкст закліку папы Францішка
аб міры ў гэтай блізкаўсходняй краіне, агучаны Пантыфікам 25 жніўня. Ён падкрэсліў,
што Святы Айцец прамаўляе ад імя усіх хрысціян. “Сірыя мае патрэбу ў стабільнасці,
а вайсковы напад на ўрад не мае сэнсу”, - сказаў Патрыярх.
Ён з жалем адзначыў,
што ў Сірыю прыбываюць ісламісты з розных куткоў свету з адной мэтай – забіваць. Паводле
іерарха ніводная з краін не перашкаджае гэтаму працэсу, а нават наадварот, дапамагае
пастаўкамі зброі. Ён адзначыў, што магчымы напад ЗША ў першую чаргу ўдарыць па мірнаму
насельніцтву і прынясе такую самую шкоду, як і хімічная зброя.
Патрыярх Лахам
падкрэсліў, што ўжо на працягу некалькіх месяцаў ідзе абмеркаванне магчымасці вайсковага
ўмяшальніцтва ў сірыйскі канфлікт, у той час як многія з ўдзельнікаў гэтай дыскусіі
забылі пра слова “дыялог”. “Многія месяца заходнія краіны згубілі на размовы, у той
час як людзі паміралі пад бомбамі Асада і ад нападаў ісламскіх экстрэмістаў “Аль-Кайды”,
- адзначыў блізкаўсходні іерарх.