28 жніўня папа Францішак
будзе цэлебраваць св. Імшу з нагоды адкрыцця Генеральнага капітула ордэна аўгустыніянаў.
Літургія адбудзецца ў касцёле св. Аўгустына ў Рыме. Генеральны настаяцель гэтай манаскай
супольнасці а. Робэрт Прэваст, расказаў, што Папа сам пажадаў прыняць удзел у гэтай
падзеі. “Некалькі тыдняў таму, мы атрымалі ад кардынала Бэртонэ, з Дзяржсакратарыяту,
паведамленне, у якім перадавалася жаданне Папы суправаджаць Генеральны капітул, прызнаючы
важнасць гэтай падзеі для жыцця ордэна, унутры Касцёла”, - расказаў законнік. Айцец
Прэваст адзначыў, што бачыць ў новым Папе “вялікі дар для Касцёла”, а таксама нагадаў
пра каштоўны пантыфікат папы на пенсіі Бэнэдыкта XVI, падчас якога Касцёл атрымаў
вялікае і важнае навучанне аб св. Аўгустыне. “Новы Папа ўзяў некаторыя элементы пантыфікату
Бэнэдыкта XVI з іншым стылем і заўсёды набліжае да Народу Божага пасланне Евангелля.
Ён жыве чалавечнасцю, блізкасцю, вялікай любоўю, суперажываннем, міласэрнасцю аб якіх
сам кажа шмат і робіць так, каб Евангелле стала жывым пасланнем сярод людзей, для
народа”, - адзначыў законнік.
Айцец Прэваст падзяліўся, што у якасці даты
адкрыцця Генеральнага капітула ордэна быў абраны ўспамін св. Аўгустына. “Св. Аўгустын,
гэта асоба, якая можа яшчэ шмат сказаць хрысціянам і усім людзям. Гэта думка павінна
суправаджаць разважанні і працу капітула. Аўгустын – гэта тая постаць, якая, як тэолаг
і пастыр, мае шмат чаго сказаць Касцёлу сёння”, - адзначыў законнік.