Սուրիոյ Մէջ Քիմիական Զէնքի Օգտագործման Հետաքննութիւնն Ու Զինուորական Միջամտութեան Պատրաստութիւնները Զուգահեռ Կ՛ընթանան

Միացեալ Նահանգներու արտաքին գործոց նախարարութենէն պաշտօնատար մը յայտարարեց, որ Միացեալ Նահանգներու արտաքին գործոց նախարար Ճոն Քերրի անցեալ հինգշաբթի օր հեռաձայնային հաղորդակցութիւն մը ունեցած է Սուրիոյ արտաքին գործոց նախարար Ուալիտ Մոալլլեմի հետ եւ սուրիական կառավարութենէն պահանջած է ՄԱԿ-ի հետաքննիչ յանձնախումբին արտօնել Ղութա Շարքիյայի մէջ քիմիական զէնքի ենթադրեալ օգտագործման վայրը այցելել:
Պաշտօնատարը աւելցուց, որ Քերրի յայտնած է, որ «եթէ սուրիական վարչակարգը ծածկելիք ոչինչ ունի, ինչպէս կ՛ըսէ, պէտք է անմիջապէս եւ առանց արգելքի արտօնէ դէպքին վայրը այցելել` փոխանակ այցելութեան արգելք հանդիսանալու եւ փաստերը ոչնչացնելու համար (քիմիական զէնքէն) վնասուած շրջանին դէմ յարձակումը շարունակելու»:
Ամերիկացի պաշտօնատարը յայտնեց, որ Քերրի Սուրիական ազատ բանակի ղեկավարներներէն երաշխիքներ ստացած է, որ քիմիական զէնքի թիրախ դարձած շրջանին մէջ ՄԱԿ-ի անձնակազմին ապահովութիւնը պիտի երաշխաւորուի: Ան աւելցուց, որ Քերրի հեռաձայնային հաղորդակցութիւններ ունեցած է նաեւ իր սէուտցի, թուրք եւ յորդանանցի պաշտօնակիցներուն հետ, այդ բոլոր հաղորդակցութեանց ընթացքին փաստերը շուտով ճշդելու կարեւորութիւնը շեշտած է եւ քիմիական զէնքի որեւէ օգտագործման լրջութիւնը ընդգծած: