У Беларусь упершыню прыбылі рэліквіі св. Яна Боска
“Дай мне душу, а іншае
забяры” – гэтыя словы напярэданні змаглі прачытаць усе, хто прыйшоў у архікатэдральны
касцёл Імя Найсвяцейшай Панны Марыі ў Мінску сустракаць рэліквіі аднаго з самых вядомых
і шанаваных каталіцкіх святых – Яна Боска. Упершыню яго рэліквіі прыбылі ў Беларусь.
Дэвіз жыцця святога напісаны на саркафагу, які ні многа ні мала весіць больш за 300
кілаграмаў. Пад шклом – гіпсавая фігура, а ў ёй – самі рэліквіі святога. Для Каталіцкага
Касцёла ў Беларусі – гэта сапраўды гістарычная падзея, адзначыў арцыбіскуп Тадэвуш
Кандрусевіч, Мітрапаліт Мінска-Магілёўскі. Па-першае, праз любога святога вернікі
звяртаюцца да Бога. Па-другое, перегрынацыя рэліквій – магчымасць не толькі фізічна,
але і духоўна дакрануцца да спадчыны св. Яна Боска, паразважаць над яго жыццём і думкамі,
якія, аказалася, часу не падуладныя, актуальныя і сёння.
“Мы ўспамінаем чалавека
свайго часу, які, аднак, быў вышэй за гэты час і яго выклікі. Святар Ян Боска жыў
у час тэхнічнай рэвалюцыі, калі людзі выязджалі з вёсак у гарады. Быў складаны час
– і беспрацоўе, і крымінал, а ён звярнуў увагу на моладзь, займаўся яе выхаваннем.
Бо мы ведаем, якой будзе моладзь, такім будзе і Касцёл, такім будзе грамадства, такім
будзе свет. Сёння мы ўсе занепакоены выхаваннем моладзі”, - сказаў іерарх.
Святар,
апякун моладзі, заснавальнік вядомага каталіцкага ордэна – салезіянаў. Ян Боска жыў
у Італіі ў ХІХ ст., усё жыццё прысвяціў працы з маладымі людзьмі. Ён стварыў нават
уласную сістэму выхавання, галоўнае ў якой – адданасць дзецям і абсалютнае выключэнне
пакарання. А яшчэ – ён заснаваў араторый, тыпаграфію і семінарыю. Яну Боска не былі
чужыя і навінкі часу, ён быццам заглядаў у будучыню, першым са святароў арганізаваў
экспазіцыю на тэхнічнай выставе і стаў першым з каталіцкіх святых, які даў інтэрв’ю
газеце. У 2015 г. спаўняецца 200 гадоў з моманту нараджэння святога. З гэтай нагоды
і адбываецца сусветная перэгрынацыя рэліквій Яна Боска. Пачалася яна ў 2009 г. і пройдзе
па 130 краінам, у тым ліку па 14 каталіцкім парафіям Беларусі. Суправаджаюць рэліквіі
прадстаўнікі кангрэгацыі салезіянаў.
Кс. Віктар Гайдукевіч, настаяцель супольнсці
ў Беларусі, адзначыў, што сустракаць рэліквіі духоўнага айца – і вялікая павага, і
вялікая радасць. “Св. Ян Боска прысвяціў усё жыццё моладзі. Ён казаў шмат слоў вельмі
важных і сардэчных. “Дастаткова, што вы маладыя, каб я вас любіў”, “Для вас я працую,
для вас я жыву, для вас я гатовы аддаць сваё жыццё” – гэтыя кароткія словы сапраўды
адлюстроўваюць харызму постаці св. Яна Боска”, - адзначыў святар.
Пасля мінскай
архікатэдры рэліквіі адправіліся ў парафію св. Яна Хрысціцеля ў Серабранцы, сёння
прыбудуць у пасёлак Бараўляны, адтуль працягнуць сваё падарожжа па краіне да 31 жніўня
– праз Багданава, Баруны, Смаргонь, Дзятлава, Наваельню ў Гродна.
“Сапраўды
– гэта радасць. З’яўляючыся членам сям’і салезіянскай моладзі, якая выхоўваецца святарамі
і сёстрамі салезіянкамі, вельмі радасна дакрануцца і духоўна, і матэрыяльна да нашага
айца, апекуна. Св. Ян Боска заўсёды клапаціўся аб выратаванні душы. Разважаючы над
яго жыццём, можна паглыбіць сваю веру і давер да Бога менавіта праз постаць Яна Боска”,
- сказала Ганна Сямак
“Дай мне душу, астатняе забяры” – гэта быў дэвіз Яна
Боска пры жыцці, гэта стала запаветам і для тых, хто шануе святога сёння. Святога,
які мог заглядваць не толькі ў будучыню, але і ў сэрцы.