Սուրիական ազատ բանակի բանբեր Ֆահտ Մասրի յայտնեց, որ սուրիական վարչակարգը Ղութա Շարքիյան
քիմիական զէնքով հարուածած է` «կարծելով, որ այդ ձեւով այդտեղ յաղթանակ պիտի արձանագրէ,
որմէ ետք Ղութա Ղարպիյա պիտի անցնի, եւ այդ բոլորը իրանեան Յեղափոխական պահակագունդին
եւ Հըզպալլայի հետ համագործակցելով»: Ան ըսաւ, որ Ղութա Շարքիյայի մէջ 1188 զոհ արձանագրուած
է, իսկ սուրիական Ազգային համաձայնական մարմինը նշեց, որ զոհերուն թիւը 650 է: Մարմինը
նաեւ ՄԱԿ-ի Ապահովութեան խորհուրդի նիստ մը պահանջեց` քննարկելու համար Դամասկոսի գիւղական
շրջաններուն մէջ տեղի ունեցած «ջարդը»: Սուրիոյ տեղեկատուութեան նախարար Օմրան Զողպի
«Մայատին» արբանեակային պատկերասփիւռի կայանին հետ հարցազրոյցի մը ընթացքին հերքեց, որ
Ղութա Շարքիյայի մէջ քիմիական զէնք կիրարկուած է` այդ լուրը վերագրելով Ծոցի արաբական
երկիրներու արբանեակային կայաններուն կողմէ քարոզչական արշաւի մը: Բրիտանիոյ արտաքին
գործոց նախարար Ուիլիըմ Հէյկ պահանջեց Սուրիոյ մէջ գտնուող քիմիական զէնքերու օգտագործման
շուրջ հետաքննութիւն կատարող ՄԱԿ-ի 20 հետաքննիչներուն արտօնել դէպքին վայրը այցելել:
Թուրքիան, Ֆրանսան եւ Արաբական լիկան իրենց կարգին հետաքննիչներէն պահանջեցին դէպքին
վայրը այցելել: Ռուսիա իր կարգին այս հարցին շուրջ արդար եւ արհեստավարժ հետաքննութիւն
մը պահանջեց եւ զգուշացուց քիմիական զէնքի կիրարկման պատրուակին տակ Սուրիոյ դէմ որեւէ
գրգռիչ քայլէ: