Papa Françesku nuk pushon së luturi për Egjiptin. Kard. Sandri: dialogu i nevojshëm,
sulmet ndaj të krishterëve të papranueshme.
Papa Françesku vijon të lutet e i fton besimtarët të vazhdojnë të luten për paqen
në Egjipt. Të dielën, në Lutjen e Engjëllit të Tënzot, bëri sërish thirrje për fundin
e dhunës në këtë vend. Mbi ngjarjet dramatike, që po përjeton popullsia egjiptiane,
flet, në mikrofonin tonë, prefekti i Kongregatës për Kishat Lindore, kardinali Leonardo
Sandri: Duam të gjendet vërtet një zgjidhje, përmes dialogut e pajtimit, për
gjendjen e tmerrshme në Egjipt. Lutemi që Zoti t’i hedhë sytë me mirësi drejt këtyre
vëllezërve tanë të krishterë. Dëshiroj të përshëndes Shenjtërinë e Tij Tauadros II,
Papë i koptëve, që u takua kohët e fundit me Papën Françesku, dua t’i bëj urimet atij
dhe krejt Kishës kopte; dua të përshëndes edhe Patrikun katolik të nderit Nagib,
si edhe Fortlumturinë e Tij, Patrikun katolik Sindrak. Jemi pranë tyre me lutje, duke
derdhur lotë shpirtërorë për vuajtjet e popullit egjiptian. Të krishterët
sulmohen nga integralistët islamikë, të cilët kanë djegur shumë kisha. Konflikti është
politik, por ekziston rreziku që të kthehet në fetar, apo jo? Shkatërrimi i
kishave të të krishterëve është i papranueshëm, sidomos sepse, veçanërisht katolikët,
janë pakicë. Rilindja e vendit duhet realizuar, duke respektuar njeriun, fetë dhe
lirinë fetare. Ne mendojmë se feja nuk mund të predikojë kurrë luftën, ose përdorimin
e dhunës. Kurrë nuk mund të përdoret forca, dhuna, terrorizmi, apo pushteti ushtarak
për të zgjidhur çështjet bazë të fesë. Duhet të mendojmë se urdhërimi i Tënzot për
ta dashur njëri-tjetrin është i vlefshëm për të gjithë, myslimanë e të krishterë.