Біскуп: мы пакліканы быць соллю, а не цукрам зямлі
Бог сустракае чалавека
там дзе ён жыве, змагаецца, пакутуе і спадзяецца. “Менавіта такую місію Езус даверыў
Касцёлу і таму чалавек з’яўляецца дарогай Касцёла”, – адзначыў біскуп італьянскага
Рыміні Франчэска Ламбіазі ў інтэрв’ю Ватыканскаму радыё. Менавіта на тэрыторыі яго
дыяцэзіі 18-24 жніўня праходзіць буйны міжнародны каталіцкі форум “Сустрэча за мір
сярод народаў”. Сёлета ён прысвечаны небяспекам, якія стварыў для чалавека сучасны
свет. Да ўдзельнікаў гэтага мерапрыемства папа Францішак скіраваў пасланне, у якім
між іншым адзначыў, што “улада баіцца людзей, якія знаходзяцца ў дыялогу з Богам,
таму што гэта іх робіць свабоднымі і непаддатнымі на асіміляцыю”. Каментуючы словы
Святога Айца, біскуп Ламбіазі адзначыў, што сапраўды, часам “улада набывае дыябальскае
аблічча, а дыябал з’ўляецца тым хто раздзяляе: ён стварае ілюзіі для чалавека”. Менавіта
таму, на яго думку, Папа казаў, пра тое, што часам, экакамічныя, палітычныя і медыйныя
ўлады ствараюць перашкоды для набліжэння Бога да чалавека. “Калі ўлада авалодвае чалавекам
і ён пачынае верыць, што сам можа стаць Богам, тада мы становімся на парозе непапраўнага
падзення, непапраўнага для нашых сіл. Таму чалавек з’яўляецца тым, хто мае мае патрэбу
ў збаўленні, якое можа быць дадзена толькі праз ласку”, - сказаў ён.
Біскуп
Ламбіазі адзначыў, што каб несці людзям Хрыста Касцёл павінен знаходзіць у сабе мужнасць
ісці супраць агульнай плыні. “Пан, паклікаў нас быць солю, а не цукрам зямлі”, - сказаў
ён і дадаў, што сустрэча ў Рыміні дапаможа глыбей паразважаць на гэту тэму. На думку
іерарха, крызіс, які ахапіў сучасны свет, стымуліруе людзей задаваць сабе больш пытанняў
аб глыбокіх каранях гэтай з’явы, таму форум - гэта цудоўная нагода, каб шукаць на
іх адказы.