Եգիպտական Ապահովական Ուժերուն Եւ Մուրսիի Համակիրներուն Միջեւ Բախումներ
Եգիպտոսի տարածքին երէկ եւս եգիպտական ապահովական ուժերուն եւ Իսլամ եղբայրներուն միջեւ
բախումներ տեղի ունեցան: Վերջիններս իրենց համակիրներուն կոչ ուղղած էին ուրբաթ օրուան
նամազէն ետք Գահիրէի մէջ փողոց դուրս գալով «Զայրոյթի քայլարշաւ» կատարելու: Եգիպտական
բանակը երէկ փակեց Ռապիյա Ատաուիյա հրապարակ տանող ճամբան ու Սատաթ կայարանը` արգելք
հանդիսանալու համար, որ ցուցարարները այդտեղ հասնին: Բանակը նաեւ արգիլեց Թահրիր հրապարակ
մուտք գործել: Իսլամ եղբայրներու համակիրները իրենց կարգին Ռամսես հրապարակին վրայ հաւաքուելով
«Քոպարի 6 օքթոպըր»-ը փակեցին: Երկու օր առաջ Գահիրէի մէջ Իսլամ եղբայրներու նստացոյցերու
ցրուումին պատճառով 638 զոհ արձանագրուած էր: Եգիպտոսի առողջապահութեան նախարարութիւնը
յայտարարեց, որ երէկուան բախումները պատճառեցին 17 զոհ եւ 118 վիրաւոր: Իսլամ եղբայրները
Մանսուրայի մէջ դարձեալ ղպտիներու եկեղեցի մը հրկիզեցին: Եգիպտական ոչ կառավարական Անհատական
իրաւունքներու եգիպտական նախաձեռնութիւն կազմակերպութիւնը յայտարարեց, որ չորեքշաբթի
եւ հինգշաբթի օր ղպտիներու եւ այլ քրիստոնէական խմբաւորումներու պատկանող 25 եկեղեցիներ,
անհատական տուներ եւ գործատեղիներ հրկիզուած են: Մինչ այդ, Եգիպտոսի ժամանակաւոր իշխանութիւնները
քննադատեցին Միացեալ Նահանգներու նախագահ Պարաք Օպամայի դատապարտումը Եգիպտոսի բռնարարքներուն: Օպամա
կառավարութեան կողմէ Ռապիա Ատաուիյա եւ Նահտա հրապարակներուն նստացոյցերը ցրուելու համար
ապահովական ուժերուն տուած կանաչ լոյսը դատապարտեց եւ Եգիպտոսի հետ միացեալ ռազմափորձերը
ջնջեց: Ան ըսաւ, որ համագործակցութիւնը չի կրնար շարունակուիլ, մինչ քաղաքայիններ
կը սպաննուին: Բայց եւ այնպէս, ան Եգիպտոսի տրամադրուած 1.3 միլիառ տոլարի օժանդակութիւնը
չջնջեց: Եգիպտական նախագահութիւնը երէկ յայտնեց, որ Օպամայի խօսքերը «իրողութեան վրայ
չեն հիմնուած» եւ «զինեալ խմբաւորումները պիտի քաջալերեն»: Նախագահութիւնը իր հրապարակած
հաղորդագրութեան մէջ նշեց, որ Եգիպտոս «ահաբեկչական արարքներ» կը դիմագրաւէ: Հինգշաբթի
ուշ գիշերին ՄԱԿ-ի Ապահովութեան խորհուրդը Ֆրանսայի, Բրիտանիոյ եւ Աւստրալիոյ պահանջով
գումարեց նիստ մը, որուն աւարտին ՄԱԿ-ի մէջ Արժանթինի դեսպանը յայտնեց, որ խորհուրդը
եգիպտական կառավարութեան եւ Իսլամ եղբայրներուն կոչ ուղղած է «առաւելագոյն զսպուածութիւն»
ցուցաբերելու եւ բռնարարքներուն վերջ տալու: Երէկ Գերմանիոյ կառավարութիւնը զգուշացուց,
որ յաւելեալ բախումներ «կրնան Եգիպտոսը բռնարարքներու եւ հակաբռնարարքներու քաոսի մէջ
խրել եւ յաւելեալ մագլցումի առաջնորդել»: Յիշեցնենք, որ երկրին մէջ արտակարգ դրութիւն
հաստատուած է եւ ապահովական ուժերուն իրաւունք տրուած է ինքնապաշտպանութեան համար իսկական
փամփուշտներ օգտագործելու: