SHBA: Asambleja e Lcwr. Delegati i Vatikanit: “Jam këtu si vëlla e mik”.
Përfundoi sot, në Orlando të Floridës, pas pesë ditësh të ngarkuara me diskutime rreth
temës: “Udhëheqja në ndryshim: Hir, Qëndrueshmëri e Liri”, Asambleja vjetore e Konferencës
të Eproreve Rregulltare të SHBA”(Lcwr), ku morën pjesë 825 rregulltare. Të ndryshëm
e të rëndësishëm argumentet në rend të ditës. Ndërmjet tyre, evoluimi i vazhdueshëm
i rolit të rregulltareve amerikane, në një shoqëri që ndryshon rrufeshëm; miratimi
i një rezolute mbi qëndrimin kundër dhunës; çështje që kanë të bëjnë me valët e emigrantëve
- ndërsa në Kongres vijon diskutimi mbi reformën e emigracionit - zgjedhja e kryetares
dhe e sekretares së re të shoqatës, që përfaqëson sot rreth 80% të më se 57 mijë rregulltareve
në Shtetet e Bashkuara të Amerikës. Por mbledhja ishte, sidomos, rast i përshtatshëm
për t’u thelluar në dokumentin “Vlerësimi doktrinor”, botuar në prill 2012 nga Kongregata
për Doktrinën e Fesë, për veprimtarinë e Lcwr e, prej këndej, për reformimin e organizimit
të Konferencës e për sigurimin e bazës së shëndoshë doktrinore të veprimtarisë së
saj në fenë e Kishës, në perspektivë të bashkimit kishtar. Dje, pas Meshës së
solemnitetit të të Ngjiturit të Zojës së Bekuar në Qiell, rregulltaret u takuan me
kryeipeshkvin, imzot Peter Sartain, delegat apostolik, i ngarkuar nga dikasteri i
Vatikanit për të ndjekur nga afër këtë riorganizim. Prelati e mori fjalën të martën
e kaluar, në hapje të punimeve, së bashku me nuncin apostolik në Uashington, imzot
Karlo Maria Viganò. Takimi, i pari me plenumin e Lcwr, pas një sërë bisedimesh të
rezervuara, zhvilluar këto muaj me kryesinë, u mbajt me porta të mbyllura e përmbajtja
e tij nuk është bërë ende e njohur. Në fjalën, që mbajti të martën e kaluar, kryeipeshkvi
i Seattle nënvizoi se u bisedua në një atmosferë konstruktive bashkëpunimi, pas tensioneve
të mëparshme.“Jam këtu, i pranishëm, si përfaqësues i Papës Françesku, i ngarkuar
për këtë mision, por njëkohësisht, jam këtu edhe si vëllai e miku juaj, shtoi prelati.
Sot pasdite, diskutimi përfundimtar i ish-kryetares, motër Florence Deacon, që
tashmë i lëshoi vendin kryetares së re, Carol Zinn, rregulltare e Kongregatës së Motrave
të Shën Jozefit.