Atë Greiche: të gjithë në Egjipt i prisnin fjalët plot shpresë dhe afërsinë e Papës
Në Egjiptin e tronditur thellë nga dhuna e nga frika e luftës civile, arritën, si
rreze e vogël shprese, fjalët e Papës Françesku, shqiptuar dje gjatë lutjes së Engjëllit
të Tënzot. Një thirrje për paqe e dialog, që u vlerësua shumë si nga të krishterët,
ashtu edhe nga myslimanët e vendit. E nënvizon këtë, atë Rafik Greiche, zëdhënës
i ipeshkvijve katolikë egjiptianë, me telefon, nga Egjipti: Përgjigje: -
Njerëzit, katolikë, por edhe ortodoksë, e madje edhe myslimanë, sapo Papa përfundoi
lutjen e Engjëllit të Tënzot, i botuan kudo fjalët e Atit të Shenjtë: në të gjitha
gazetat, në të gjitha kanalet e internetit, sikur të gjithë të ishin në pritje,
që Papa të fliste! Në mënyrë të veçantë katolikët e ndjenë fort se Papa është pranë
tyre, se lutet për ta e se përpiqet të ngjallë në zemrat e tyre shpresën: e ne pikërisht
për këtë kemi më shumë nevojë.
Pyetje: - Si është situata
sot? A keni frikë se mund të rifillojë gjakderdhja?
Përgjigje: -
Mbrëmë pati shumë manifestime të Vëllezërve Myslimanë; nuk mungoi as dhuna, e jo vetëm
mbi kishat, por edhe mbi institucionet. Iu vu flaka edhe stacioneve të policisë. 40
kisha, nga të cilat, 10 katolike e 30 ortodokse, protestante e greko-ortodokse, u
gjuajtën me raketa ose u kallën flakë, për mos të thënë se u bënë rrafsh me tokë….
Pyetje:
- Si mendoni se mund të gjindet një rrugë pajtimi?
Përgjigje: -Më
vjen shumë keq, por më duhet të them se nuk është aspak te lehtë të pajtohemi, sepse
Vëllezërit Myslimanë dhe të gjitha partitë myslimane, nuk po impenjohen në kërkimin
e rrugëzgjidhjes politike. Njerëzit duan një Egjipt paqësor, ndërsa një grup i vogël
po përhap dhunë e terror, deri në fshatrat e vogla të Egjiptit të Epërm.