“Кожнае наша “так”
сказанае Богу – гэта крок у накірунку Неба, у накірунку вечнага жыцця”, - сказаў папа
Францішак перад малітвай “Анёл Панскі”, якая прайшла 15 жніўня на плошчы перад Апостальскім
палацам у Кастэль Гандольфа на заканчэнне Эўхарыстыі. Звяртаючыся да вернікаў Святы
Айцец адзначыў, што шлях Марыі на Неба пачаўся ў Назарэце, менавіта тады, калі яна
адказала згодай на прапанову анёла, які расказаў пра Божы план для яе. Святы Айцец
нагадаў, што сёння адзначаецца 25-годдзе з публікацыі Апостальскага ліста бл. Яна
Паўла ІІ “Mulieris dignitatem”, аб годнасці і пакліканні жанчын. “Гэты дакумент, багаты
думкамі, якія павінны быць зноў узняты і развіты”, - сказаў Папа і дадаў, што натхненнем
для выдання гэтага дакумента стала менавіта Маці Божая, а з’яўвіўся ён дакладна ў
Год прысвечаны ў Касцёле Панне Марыі. Папа заклікаў вернікаў маліцца словамі, якія
змешчаны напрыканцы гэтага Апостальскага ліста, каб “разважаючы над біблійнай таямніцай
жанчыны, выражанай у Марыі, усе жанчыны маглі знайсці саміх сябе і поўню сваго паклікання”.
Францішак
падзякаваў усім, хто прыйшоў, каб памаліцца разам з ім, жыхарам Кастэль-Гандольфа
і пілігрымам з розных краін свету.