Në Engjëllin e Tënzot, lutja e Papës për paqen në Egjipt

Në përfundim të kremtimit eukaristik në Kastel Gandolfo, Papa kryesoi lutjen e Engjëllit të Tënzot, duke bërë edhe thirrje për paqen në Egjipt. Më pas kujtoi rolin e gruas në Kishë.
Papa Françesku ndjek me shqetësim të thellë atë, që po ndodh në Egjipt, prej nga, pohoi, për fat të keq, vijojnë të arrijnë lajme tejet tronditëse e të dhimbshme:
“Dëshiroj të siguroj se lutem për viktimat e familjarët e tyre, për të plagosurit e për të gjithë ata, që vuajnë. Të lutemi së bashku për paqen, dialogun, pajtimin, në këtë Tokë e në mbarë botën. Mari, Mbretëreshë e Paqes, lutu për ne. Ta themi të gjithë: Mari, Mbretëreshë e Paqes, lutu për ne!”.
Pastaj Papa kujtoi 25-vjetorin e Letrës Apostolike Mulieris dignitatem të të Lumit Gjon Pali II, kushtuar dinjitetit dhe rolit të gruas. Është, theksoi, një dokument plot mendime, që meritojnë të ristudiohen e të zhvillohen më tej. Mbi bazën e të gjithave, figura e Marisë:
“Ta bëjmë tonën lutjen e fundit të kësaj Letre Apostolike (cfr n 31). Të lutemi, pra, që duke medituar misterin biblik të gruas, përmbledhur tek Maria, të gjitha gratë të gjejnë vetveten, ta përsosin thirrjen e tyre e, në mbarë Kishën, të thellohet e të kuptohet gjithnjë më shumë, roli tepër i madh e i rëndësishëm i gruas”.
Rol ky, i cili nis me ‘po’-në, përgjigje, që i dha Maria Kryeengjëllit, në Nazaret:
“E në të vërtetë është pikërisht kështu: çdo ‘po’, që i thuhet Zotit, është një hap drejt qiellit, drejt jetës së pasosur. Sepse këtë do Zoti: që të gjithë bijtë të kenë jetë e ta kenë me begati! Zoti na do të gjithë me vete, në shtëpinë e Tij”.
Në përfundim, Papa i falënderoi të pranishmit, posaçërisht shtegtarët e ardhur nga Guinea, me ipeshkvin e tyre.