Ватыканскі кардынал: літургія адыгрывае ключавую ролю ў экуменічным збліжэнні
Кардынал Курт Кох
лічыць, што хрысціянская вера нідзе не знаходзіць настолькі поўны выраз, як у літургіі.
Такім чынам, яна адыгрывае ключавую ролю ў экуменічным збліжэнні канфесій, заявіў
старшыня Папскай рады спрыяння хрысціянскаму адзінству, які ў гэтыя дні прабывае ў
нямецкім Вюрцбургу, дзе да 10 жніўня праходзіць Міжнародны літургічны кангрэс. Ватыканскі
іерарх заклікаў католікаў браць за ўзор хрысціян усходняй традыцыі, для якіх - як
адзначыў - літургія – гэта не толькі святкаванне ў супольнасці, але і падзея ў касмічным
вымярэнні.
Паводле меркавання швейцарскага кардынала, для экумэнізму важны
роздум над арыгінальнай формай літургіі, над той, якую цэлебравалі ў першыя стагоддзі
хрысціянства. Ён звярнуў увагу на літургічнае абнаўленне, якое здзейснілі ў ХХ стагоддзі
католікі і пратэстанты, і заўважыў, што дзякуючы спасылцы на пачаткі хрысціянства
з’явілася шмат агульных літургічных элементаў.
Англіканскі тэолаг Пол Брэдшоў,
які бярэ ўдзел у Кангрэсе, адзначыў, што ў пошуку “першасных” форм набажэнства гісторыкі
да гэтага часу сутыкаліся з цяжкасцямі. На яго думку, гэта сведчыць аб тым, што з
пачатку дзеяў хрысціянства абрады не былі аднастайнымі, як лічылася раней. Іх характарызавала
вялікая разнастайнасць, якая не перашкаджае далейшаму пошуку агульных элементаў.
Брэдшоў
таксама адзначыў, што парадак біблійных чытанняў, уведзены ў Каталіцкім Касцёле пасля
II Ватыканскага сабору (1962-1965), пазней - у частцы або ў цэлым - пераняла вялікая
частка Цэркваў Рэфармацыі. Таксама ў многіх мовах былі ўзгоднены сумесныя тэксты малітвы
“Ойча наш” і “Сімвалу веры”. У цяперашні час, аднак, існуе тэндэнцыя, замест таго,
каб шукаць агульныя элементы ў літургіі, даецца выраз уласнай рэлігійнай ідэнтычнасці.
Нагодай
для правядзення Літургічнага кангрэсу ў Вюрцбургу стала 50-годдзе саборнай Канстытуцыі
аб святой літургіі “Sacrosanctum Concilium”. Гэты дакумент, які з’явіўся ў 1963 г.,
стаў асновай для распачацця каталіцкімі біскупамі на ўсім свеце рэформы імшальнай
літургіі і набажэнстваў.