Qeveria egjiptiane lajmëron dështimin e ndërmjetësimit ndërkombëtar
Gjendje kritike në Egjipt, ku dështoi mundësia e ndërmjetësimit ndërkombëtar, nën
udhëheqjen e SHBA-ve, që duhej të synonte fundin e krizës politike në vend. Lajmi
jepet nga vetë qeveria e Kajros, e cila, në një notë, shpjegon se përkrahësit e ish-presidentit
Morsi nuk u morën vesh me kundërshtarët e tij, aktualisht në pushtet. Nga njëra anë,
qeveria denoncon se partia e Vëllezërve Myslianë ka organizuar protesta aspak paqësore,
nga ana tjetër, opozita lajmëron se demonstruesit nuk do të largohen nga sheshet deri
në kthimin e Morsit në presidencë e në rivendosjen e Kushtetutës. Pedagogu i Marrëdhënieve
Ndërkombëtare në Universitetin e Torinos, Luigji Bonanate, shpjegon në mikrofonin
tonë, cilët janë skenarët e mundshëm në Egjipt: Janë kaq të shumtë, sa është
e pamundur të kuptohet gjë. Besonim se me Morsin, ishte arritur një farë qëndrueshmërie,
e cila i vinte fre edhe shqetësimit, që ndjenim nga ardhja në fuqi e partisë së Vëllezërve
Myslimanë. Pastaj, puçi kundër Morsit, i cili, duke kundërshtuar më fuqishëm Vëllezërit
Myslimanë, nxiti aktivizimin më të madh të tyre. Pyetja, që i bëj vetes vazhdimisht,
është: “A jemi marrë me kujdes e vëmendje, vitet e fundit, me të gjitha këto probleme,
apo i kemi parë nga dritarja këto ‘Pranvera Arabe’ me kënaqësi, por edhe me ironi?”.
Dështimi i SHBA-ve hedh dyshime edhe mbi rolin e ndërmjetësuesit, që Egjipti
e ka luajtur gjithmonë në Lindjen e Mesme… Pikërisht, ky është problemi: SHBA-të
janë ndërmjetësues për Perëndimin. Egjipti konsiderohej ndërmjetësues për Lindjen
e Mesme, madje, duhej të shërbente si i tillë edhe për çështjen izraelito-palestineze.
Pastaj, kishim Sirinë, që duhej të kryente rolin e ndërmjetësuesit mes Irakut e vendeve
të tjera. Ndoshta, aty gabuam. Nëse lufta siriane përhapet në Egjipt, kjo do t’i vinte
zjarrin krejt Lindjes së Mesme. Nuk ka hipotezë më të frikshme se kjo.