Papa inkurajon shtegtarët e rinj breshanë; gëzimi buron nga jeta e jetuar plotësisht
Dje pasdite Papa Françesku zbriti në Kriptën e Vatikanit, nën Bazilikën e Shën Pjetrit,
për t’u lutur pranë varrit të Palit VI, në 35 vjetorin e vdekjes. Më pas u takua me
një grup të rinjsh nga dioqeza e Breshas, në shtegtim vokacional. Të rinjtë sapo kishin
arritur në Romë nga Poxhio Bustone, provinca e Rietit, pasi kishin përshkuar në këmbë
140 kilometra, për një javë të tërë, duke ndjekur rrugën Francigjene, për të përkujtuar
përvjetorin e vdekjes së bashkëqytetarit të tyre, Papës Montini. U printe don Alesandro
Tuçinardi, drejtor i Zyrës së përshpirtërisë dhe thirrjeve meshtarake, në dioqezën
e Breshas. Në mikrofonin tonë, flet për takimin e papritur me Papën:
Përgjigje:
- Po, ishte takim i papritur: prej kohe donim ta takonim; na u krijua mundësia
për të marrë pjesë në një audiencë, por pastaj gjithçka u ndërpre. Atëherë iu lutëm
Provanisë të na ndihmojë me mjete krejt të thjeshta e të zakonshme. Papa e mori vesh,
e deshi të na takonte.
Pyetje: - Ku u zhvillua ky takim?
Përgjigje:
- Ishim të gjithë në Meshë për përvjetorin e vdekjes së Palit VI, në Shën Pjetër.
Dolëm në oborr, përballë Shtëpisë së Shën Martës, e aty e takuam Atin e Shenjtë, që
na priti me kënaqësi, sepse i pëlqen shumë e gjithnjë, të takohet me të rinjtë. Të
rinjtë i kujtuan disa nga mesazhet e tij të DBR-së. I dhuruam një mbajtëse kripe,
mbasi ai vetë na ka kujtuar se përtëritja e Kishës niset nga të rinjtë; se çdo i ri
duhet t’i shtjerë kripë, domethënë fe, shpresë e dashuri, jetës së çdo dite.
Pyetje:
- Fjalët, që ju drejtoi Papa?
Përgjigje: - Na tha fjalë inkurajimi.
Na kujtoi se nuk duhet ta shikojmë jetën si lojë, sepse e jetuar si lojë, jeta bëhet
e trishtuar. Duhet ta jetojmë në mënyrë të plotë e serioze, mbasi kjo mënyrë jetese
të mbush me gëzim. I ftoi të rinjtë të jenë të përgjegjshëm. E i bekoi një për një,
duke gjetur për secilin një fjalë të mirë, lidhur me thirrjet e larmishme të këtyre
të rinjve. Nuk mund të mos theksoj se ky takim ndezi në zemrat e të rinjve dëshirën
për të qenë, në gjirin e bashkëmoshtarëve, kumtues të këtij gëzimi i cili, siç na
kujton Pali VI, buron nga zbulimi i një Zoti që, përveçse bukuri e dashuri, është
edhe gëzim.