Atentat në periferinë druzo-kristiane të Damaskut: së paku 18 viktima
“Siria pranoi të dërgojë pa kushte, një delegacion në Mbledhjen Gjeneva 2, që tani,
nuk mund të shtyhet më”: kështu tha dje në Romë, ministri i jashtëm rus, Sergei Lavrov,
duke shtuar se Moska është në pritje të një hapi të ngjashëm nga opozita. Ndërkaq,
në vend, vazhdon lufta. Në veri, në zonën e Halebit, rebelët përforocojnë pozicionet,
duke marrë në dorë zonën e Menegut, në kufi me Turqinë; në rajonin e Homsit, janë
besnikët e regjimit që fitojnë terren, në sajë të mbështetjes së hezbollahëve nga
Libani. Fatkeqësisht, vendi është i bashkuar vetëm nga dhuna. Ngjarja më e rëndë e
ditëve të fundit ndodhi pikërisht dje, në periferinë druzo-kristiane të Damaskut,
ku një autobombë shkaktoi 18 viktima, ndër të cilët 3 fëmijë. Shpërthimi ishte planifikuar
me kujdes, pikërisht para iftarit të Ramazanit, kur rrugët janë plot e përplot. Sipas
opozitës, gjatë muajit të shenjtë të myslimanëve, janë vrarë 1700 vetë, në 20 sulme
të ndryshme nga ana e qeverisë së Bashar al-Asadit.