Թուրք Երեսփոխանը «Ազգութեան Ծածկագիրներու» Վերաբերեալ Էրտողանէն Բացատրութիւն Պահանջած
Է
Թուրք երեսփոխան, ընդդիմադիր Հանրապետական ժողովուրդի կուսակցութեան ներկայացուցիչ Սեզկին
Թանրըքուլու հարցապնդում ներկայացուցած է Թուրքիոյ վարչապետ Ռեճեփ Թայիփ Էրտողանին` «ազգութեան
ծածկագիրներու» առնչութեամբ պաշտօնական տեղեկութիւն պահանջելով: Նախապէս հաղորդուած
էր, որ Թուրքիոյ մէջ բնակող յոյներու ծածկագիրը «1» է, հայերունը` «2», իսկ հրեաներունը`
«3»: «Այդ ծածկագիրները մինչեւ հիմա ինչո՞ւ գաղտնի պահուած են: Փոքրամասնութեան ներկայացուցիչներու
հաւատքի եւ ազգութեան մասին տեղեկութիւնները արձանագրուա՞ծ են: Անոնք միայն կրթութեան
նախարարութեան կողմէ՞ կ՛օգտագործուին, թէ՞ բոլոր հոլովոյթներուն մէջ` ոստիկանութեան,
դատարաններուն, հետախուզութեան եւ կալուածոց վարչութեան մէջ», հարցուցած է երեսփոխանը: Թանրըքուլու
նաեւ հարց տուած է, թէ ո՞ր օրէնքին վրայ հիմնուելով սկսած են նման միջոցառում որդեգրել: Տակաւին
յստակ չէ, թէ Թուրքիոյ մէջ բնակող իսլամ փոքրամասնութիւններու ներկայացուցիչները արդեօք
ծածկագիր ունի՞ն, թէ՞ ոչ: