Ֆրանչիսկոս Քահանայապետի Պաշտօնական Այցը Գասդել Կանտոլֆոյ։

Կիրակի 14 յուլիսին ֆրանչիսկոս Սրբազան Քահանայապետը պաշտօնական այցլելութեամբ կը մեկնի Գասդել Կանտոլֆոյ, ուր կը գտնուի նաեւ Քահանայապետական ամարանոցը։ ֆրանչիսկոս Պապը այս առթիւ Քահանայապետական Պալատի կեդրոնական մուտքէն կ՛ արտասանէ Հրեշտակ Տեառն մարեմեան աղօթքը։

Կիրակի 14 յուլիսի առաւօտեան ժամը 9-ին Նորին Սրբութիւնը ինքնաշարժով
կը մեկնի Վատիկանէն եւ 9,30-ին կը հասնի Գասդել Կանտոլֆոյի Քահանայապետական ամարանոց, ուր մուտքին զինք կը դիմաւորեն Քահանայապետական Պալատի աշխատակազմը, Ալպանօ թեմի եպիսկոպոսը, եւ Գասդել Կանտոլֆոյի քաղաքապետը։ Քահանայապետական Պալատի աշխատակիցներուն հետ հանդիպումէն ետք ֆրանչիսկոս Պապին բարի գալուստի խօսք կ՛ուղղեն Ալպանօ Թեմի Եպիսկոպոս` գերապայծառ Մարչէլլօ Սէմէրարօ, Քահանայապետական Պալատի տնօրէն` Տիար Սավէրիօ Բէդրիլլօ եւ Գասդել Կանտոլֆոյի քաղաքապետ` Տիկ. Միլավիա Մոնաքեզին։ Ապա խօսք կ՛առնէ նաեւ ֆրանչիսկոս Պապը։
Ժամը 12-ին քահանայապետական պալատի կեդրոնական սեմէն Նորին Սրբութիւնը կ՛արտասանէ Հրեշտակ Տեառն մարեմեան աղօթքը որուն աւարտին Յիսուսեան կրօնաւորներու հասարակութեան հետ միասին կը բաժնեկցի եղբայրական ագապը ու յետմիջօրէին կը վերադառնայ Վատիկան։
Յայտնենք որ ֆրանչիսկոս Քահանայապետը Գասդել Կանտոլֆոյի ամարանոց փոխադրուած էր նաեւ իր գահակալութենէն անմիջապէս ետք` 23 մարտին. հանդիպելու համար Պենետիկտոս ԺԶ վաստակաւոր քահանայապետին որ այդ օրերուն բնակութիւն հաստատած էր այնտեղ։