«Եգիպտական Բանակը Ժողովրդավարութիւնը Վերականգնեց» Ըսաւ Քերրի

Մինչ Գահիրէի Ռապիա Ատուիա եւ Նահտա հրապարակներուն վրայ Իսլամ եղբայրներու նստացոյցերը ցրուելու ժամկէտին շուրջ սպասողական վիճակ կը տիրէ, Ուաշինկթըն իր կեցուածքը վճռեց ի նպաստ Մոհամետ Մուրսիի պաշտօնազրկումին, երբ Միացեալ Նահանգներու արտաքին գործոց նախարար Ճոն Քերրի փաքիստանեան «Ճիօ» պատկերասփիւռի կայանին հետ ունեցած զրոյցի մը ընթացքին յայտնեց, որ «բազմամիլիոն մարդիկ բանակէն պահանջեցին միջամտել, որովհետեւ քաոսային եւ բռնութեան վիճակի մը մէջ մտնելէ կը վախնային»` աւելցնելով, որ «ինչ որ գիտենք այն է, որ բանակը առայժմ (իշխանութիւնը) չգրաւեց եւ երկիրը կառավարող քաղաքային կառավարութիւն մը գոյութիւն ունի: Իրականութեան մէջ անոնք ժողովրդավարութիւնը կը վերականգնեն»: