Atë Kazalone: Papa Françesku u kërkon jezuitëve të gjejnë udhë të reja ungjillëzimi
“Të jemi njerëz me rrënjë e themel në Kishë: kështu na do Jezusi”: kjo është njëra
nga frazat e homelisë së Papës Françesku, në meshën e kremtuar së bashku me jezuitët
më 31 korrik, në Romë, me rastin e festës së Shën Injacit të Lojolës. Si i pritën
sivëllezërit, fjalët e Papës së parë jezuit në historinë e Kishës? Të dëgjojmë eprorin
provincial të jezuitëve të Italisë, atë Karlo Kazalone: Kemi përshtypjen
e familjaritetit e të afërsisë së madhe me Papën Françesku, i cili e njeh udhën, formimin
brenda Shoqërisë së Jezusit e – siç nënvizoi eprori i përgjithshëm, atë Adolfo Nikolas
– e ndjen veten jezuit e madje, mendon si jezuit. Papa Françesku kërkoi të
mos krijohen udhë paralele në Kishë, ndërsa miratoi idetë krijuese, që e përtërijnë
udhën e Kishës… Për këtë, duhet të them se Papa Françesku u bën jehonë fjalëve,
që Benedikti XVI pati thënë në Mbledhjen e përgjithshme të Jezuitëve, në vitin 2008:
“Shkoni drejt kufijve”. Kjo do të thotë të shkojmë në ato vende - që Papa Bergolio
i quan periferi - ku jemi më pak të pranishëm. Janë jo vetëm periferi gjeografike,
por edhe kulturore e jetësore, skuta varfërie, mënjanimi, brishtësie, për të cilat
flet Ungjilli. Prandaj, duhen gjetur mënyra të reja ungjillëzimi, që nuk e ndryshojnë
Ungjillin, por ndryshojnë dëshmimin e tij, përtërijnë personin ose bashkësinë që ungjillëzon,
e bëjnë Fjalën e Zotit të kuptueshme konkretisht nga ata, që e dëgjojnë. Ndoshta
dikujt mund t’i jetë dukur e çuditshme, por Papa theksoi disa herë në homeli fjalën
“turp”. Në çkuptim? Papa Françesku është thellësisht i rrënjosur në përshpirtërinë
e Shoqërisë së Jezusit e kjo fjalë, e përdorur prej tij, vjen nga ushtrimet shpirtërore.
Në fillim të ushtrimeve, shën Injaci i Lojolës flet për meditimin mbi mëkatin. Papa
Françesku tha se ne nuk e kemi të lehtë të ndjejmë turp për të këqiat që kemi bërë,
apo për ato ku jemi përfshirë njëfarësoj. Ndërkaq, është mirë t’i njohim kufizimet
tona e të përpiqemi, me ndershmëri, t’i zbulojmë ato zona të errëta, atë anë të fshehtë
të përvojës sonë njerëzore, që ka të bëjë me turpin e me fajin. Mendoj se kjo është
një udhë e mirë, që fillon me kthimin e zemrës për çdo besimtar, duke nisur nga vetë
Papa.