Нова Маала се претвори во мал Рио де Жанеиро

Овие денови парохијата Успение на Пресвета Богородица – Нова Маала беше во центарот на црковните случувања во Македонија. Во сабота и недела 27 и 28 јули беше местото каде се одржа Светскиот Ден на Млади во Македонија, со што младите од Македонија молитвено беа во единство со Црквата во светот, со Папата и со младите во Рио. Маса млади луѓе од сите парохии во Макеоднија, облечени во жолта - бела боја, го преплавија црковниот двор. Нова Маала се претвори во мал Рио де Жанеиро. Присуството на овој настан на Н.В.П. монсињор д-р Киро Стојанов, бискуп Скопски и Апостолски егзарх во Македонија, на младите им даде уште поголема подршка и храброст за сведочење на Христовото Евангелие.

Учесниците со песна свечено го пречекаа Н.В.П. монсињор д-р Киро Стојанов, а потоа заеднички пред Богородица молеа Молебен до Пресвета Богородица. По интонирањето на македонската химна беа претставени ликови од историјата на Католичката Црква во Македонија: Христофор Димитар Назов, Блажена Мајка Тереза и отец Јосиф и сестра Еврозија Алоати. По кратката пауза, на креативен начин преку игра, песна и презентации се претставија парохиите од Апостолскиот егзархат во Македонија и Скопската бискупија. Сето ова беше пропратено со песни изведени од страна на групата Еклезија и членовите на Неокатекуменскиот пат во Македонија.

Кулминација на оваа средба беше Обожавањето на Пресветата Причест, кое го предводеше Н.П. д-р Киро Стојанов. За време на обожавањето младите од парохиите преку нивните молитви се молеа до Господ Бог за: Црквата, Папата, владиката, парохиите, брачните парови, старите, болните, децата и младите. По благословот со Светата Причест од страна на епископот Стојанов и неговите зборови на охрабрување, младите со молитва се упатија во дворот на Црквата, каде на симболичен начин беа запалени личните прозби на младите, кои претходно беа принесени на олтарот.