Միջին Արեւելքի Խաղաղութեան Բանակցութիւնները Այսօր Կը Վերսկսին Ուաշինկթընի Մէջ
Միացեալ Նահանգներու արտաքին գործոց նախարարութիւնը յայտնեց, որ իսրայէլացի եւ պաղեստինցի
բանագնացներ այսօր Ուաշինկթընի մէջ պիտի վերսկսին խաղաղութեան բանակցութիւններուն: Արտաքին
գործոց նախարարութեան բանբեր Ճեն Փսաքի նշեց, որ նախնական բանակցութիւնները տեղի պիտի
ունենան երկուշաբթի գիշեր, ապա պիտի շարունակուին երեքշաբթի օր: Ան ըսաւ, որ Միացեալ
Նահանգներու արտաքին գործոց նախարար Ճոն Քերրի կիրակի օր հեռաձայնային հաղորդակցութիւն
ունեցած է Իսրայէլի վարչապետ Պենիամին Նեթանիահուի եւ Պաղեստինեան իշխանութեան նախագահ
Մահմուտ Ապպասի հետ, եւ անոնք համաձայն գտնուած են, որ բանակցութիւնները առիթ ծառայեն
յառաջիկայ ամիսներուն ընթացքին բանակցութիւնները յառաջ մղելու գործնական ծրագիր մը մշակելու: Քերրի
հաղորդագրութիւն մը հրապարակելով յայտնեց, որ «երկու ղեկավարներն ալ պատրաստակամութիւն
ցուցաբերած են տալու դժուար որոշումներ, որոնք այս կէտին հասնելու համար վճռական դեր
ունեցած են»: Իսրայէլեան պատուիրակութեան նախագահն է Իսրայէլի արդարադատութեան նախարար
Ցիփի Լիվնի, որ երէկ կանուխ առաւօտեան ուղղուեցաւ Ուաշինկթըն` յայտնելով, որ Միացեալ
Նահանգներ կը մեկնի «զգուշաւորութեամբ, սակայն նաեւ յոյսով»: Պաղեստինցի բանագնացները
իրենց կարգին մեկնեցան Ուաշինկթըն: Պաղեստինեան պատուիրակութիւնը կը գլխաւորէ աւագ բանագնաց
Սայեպ Օրէյքաթ: Ապպասի օգնականներէն Նեպիլ Ապու Ռուտէյնա Յորդանանի մայրաքաղաք Ամման
իր այցելութեան ընթացքին յայտնեց, որ «Իսրայէլի եւ պաղեստինցիներուն միջեւ խաղաղութեան
բանակցութիւնները պիտի սկսին երեքշաբթի օր` Ուաշինկթընի մէջ»: «Ապպաս Միացեալ Նահանգներու
արտաքին գործոց նախարար Ճոն Քերրիէն բանակցութեանց մասնակցելու համար Ուաշինկթըն ուղղուելու
հրաւէր մը ստացաւ»: Ռուտէյնա ըսաւ, որ «առաջին ժողովին նպատակը երկու կողմերուն համար
գործնական աշխատանքի ծրագիրի մը ճշդումն է, որպէսզի անոնք կարենան յառաջիկայ ամիսներուն
ընթացքին բանակցութեանց մէջ յառաջ ընթանալ»: