Telegrami i Papës Françesku për viktimat e Kampanies në Itali
Në një atmosferë mallëngjimi të madh, u kremtua sot paradite në Pallatin e Sportit,
në Pocuoli të Italisë, funerali i 38 viktimave të autobuzit, që ra në Monteforte Irpino,
në autostradën Napoli-Bari, të dielën mbrëma. Mesha u kremtua nga ipeshkvi i vendit,
imzot Xhenaro Paskarela, në praninë e kryeministrit të Italisë dhe të autoriteteve
të tjera. Për të gjithë familjarët e viktimave, mbërritën ngushëllimet e Papës Françesku,
i cili i siguron se do të lutet për ta dhe u uron të plagosurve shërim të shpejtë.
U jep një “bekim të veçantë” atyre, që vajtojnë të dashurit. Në telegramin, me firmën
e Sekretarit të Shtetit, kardinalit Tarçizio Bertone, dërguar dje, shkruhet: “Sapo
e mori vesh lajmin e hidhur të aksidentit dramatik rrugor në autostradën A16 Napoli-Kanoza,
ku humbën jetën shumë vetë, ndër të cilët edhe disa fëmijë, Ati i Shenjtë shprehu
pjesëmarrjen e tij të thellë në dhimbjen, që ka përfshirë territorin kampan e, ndërsa
siguron lutje të zjarrta për shpirtin e viktimave të shumta, që Zoti Atë t’u japë
atyre pushimin e pasosur, i kërkon Hyjit shërimin e shpejtë të të plagosurve e jep
një bekim të veçantë apostolik, si ngushëllim për të gjithë ata, që vajtojnë humbjen
e të dashurve”.