Papa viziton Spitalin e Shën Françeskut: “Në këtë spital, të bëhet konkrete shembëlltyra
e Samaritanit të Mirë”.
Ndërsa në Evropë trokiste mesnata, në Rio ishte ora 18.30, gjë që na pengon ta përcaktojmë
saktësisht kohën e ta ndjekim menjëherë Papën, gjatë vizitës në Spitalin e Shën Françeskut.
Atje ishte Ati i Shenjtë sot, që për ne, është dje! Dje, pra, në orën 17. 30 me
orën e Rios, 23. 30 me atë evropiane, Papa Françesku, pas kthimit nga Aparesida, u
ndalua në Spitalin e Shën Françeskut për një nga vizitat, që i kërkoi shprehimisht
ai vetë e që u organizua brenda shtegtimit apostolik në Brazil. Për ta përshëndetur
Atin e Shenjtë në mjedisin spitalor ishte edhe delegacioni i njërës nga qendrat e
rehabilitimit të të droguarve e të alkoolistëve, që quhet “Projekti Betania” e që
punon ndërmjet njerëzve të braktisur në favelat e “Qytetit të Hyjit”, në rrethinat
e metropolit karioka. Projekti, në këtë skutë bote, lindi falë frymëzimit të një murgeshe
braziliane, motër Elsi Zerma-s. Murgesha njihet si engjëll i lagjeve të lëna pas dore.
E quajnë edhe Nënë Tereza e favelave, sepse në këto lagje jetojnë të varfërit më
të varfër të Rios. Një univers varfërie e përjashtimi, ku dy vjet më parë policia
e ndalonte hyrjen e njerëzve normalë. Ndërsa sot në mes të të varfërve takon vazhdimisht
murgeshat paoline, Dishepulle të Përshpirtshme të Mësuesit Hyjnor, që shkojnë për
të adhuruar Jezusin Eukaristi, në fëtyrën e të varfërve. Papa e quajti spitalin,
shenjtërore të vuajtjes njerëzore e kujtoi se kur Shën Françesku përqafoi të gërbulurin,
e kuptoi se nuk ishin sendet materiale, pasja, idhujt e botës, pasuria e vërtetë.
Kjo pasuri nuk mund ta falë gëzimin, që nuk shitet, as nuk blihet. Gëzimi i vërtetë
gjindet udhëkryqeve të botës, ku Krishti të pret, për t’i shërbyer, të pret me fytyrën
e tjetrit, të vëllait, mikut, të varfërit, të droguarit, pijanecit, shpresëhumburit.
Të pret me fytyrën e të gërbulurit që, për Shën Françeskun e Asizit, qe ‘ndërmjetësues
i dritës’. Spitali i Shën Françeskut është vend ku mjekohen të droguarit, e Ati
i Shenjtë deshi t’i përqafonte një për një të pranishmit, si korp i Krishtit, duke
u lutur që Zotit ta mbushë me kuptim e shpresë udhën e tyre, e edhe udhën e tij: “Në
Brazil e në mbarë botën ka shumë situata, siç është lufta kundër vartësisë nga droga,
që kërkojnë vëmendje, dashuri. Sa tregtarë të vdekjes ndjekin logjikën e pushtetit
e të parasë me çdo kusht! Tregtimi i drogës favorizon dhunën, mbjell dhimbje e korr
vdekje”. Prandaj Papa kërkoi nga ana e mbarë shoqërisë një akt të guximshëm,
me bindjen se liberalizimi i përdorimit të drogës, për të cilin flitet në shumë vende
të Amerikës Latine, nuk mund ta kufizojë përhapjen dhe ndikimin e vartësisë nga ky
mjet i vdekjes. Për të shpëtuar nga droga, duhen zgjidhur problemet, që çojnë në përdorimin
e saj, duke i edukuar të rinjtë me vlerat e jetës së përbashkët, duke i shoqëruar
në vështirësi e duke u dhënë shpresë për të ardhmen: “Ta përqafosh të droguarin,
nuk mjafton! Duhet t’i japim dorën atyre, që kalojnë çaste të vështira, që kanë
rënë në honin e drogës. Ndërsa atyre, që nuk kanë më guxim të ecin në rrugën e çlirimit,
u themi: ‘Do të gjesh dorën e shtrirë të atij, që dëshiron të të ndihmojë, por askush
nuk mund t’i ngjitet së përpjetës në vendin tënd”. Më pas Papa u kujtoi
të gjithë atyre, që kanë dëshirë të kapin përsëri majat e jetës, me vullnetin e njeriut
të etur për rifitimin e lirisë së shpirtit e të korpit, se nuk janë, as nuk do të
jenë kurrë vetëm: “Kisha e shumë njerëz janë pranë jush. Mos lejoni t’jua
rrëmbejnë shpresën! Të bëhemi të gjithë mbartës të shpresës! Këtu, në këtë spital,
të bëhet konkrete shembëlltyra e Samaritanit të Mirë. Këtu nuk ka indiferencë, por
vëmendje, nuk ka çkujdesje, por dashuri”. Shoqata e Shën Françeskut dhe
Rrjeti i Mjekimit, kujtoi në vijim Ati i Shenjtë, na mësojnë të përkulemi mbi atë,
që kalon çaste të vështira, sepse në të shikohet fytyra e Krishtit, sepse në të është
korpi i Krishtit, që vuan. Në përfundim Papa ritheksoi me forcë: “Kisha nuk
është larg mundimeve tuaja, por ju shoqëron me dashuri”.