Atmosfera e festës rinore në Rio-de-Zhanéjro u trazua nga lajmet dramatike, që arritën
mbrëmë nga Spanja. Papa Françesku u njoftua menjëherë për përmbysjen e një treni,
që udhëtonte drejt Santiagos së Kompostelës. Të shumtë, shtegtarët e nisur nga vise
të ndryshme, për të marrë pjesë, posaçërisht sot, në kremtimin e festës së Shën
Jakut. Dramatik, bilanci; rreth 80 të vdekur e 140 të plagosur. Aksidenti, më
i rëndi në Spanjë gjatë 70 vjetëve të fundit, ndodhi rreth orës 20.42, kur treni
i shpejtësisë së lartë Madrid-Ferrol ndodhej vetëm tri kilometra larg stacionit të
Santiagos së Kompostelës. Sipas atyre, që shpëtuan gjallë, aksidenti ishte pasojë
e shpejtësisë së madhe në kthesë, gjë që shkaktoi përmbysjen e vagonave njëri mbi
tjetrin. Ndonëse një nga dëshmitarët pamor pohon se ka dëgjuar një shpërthim të fortë,
autoritetet e përjashtojnë çdo mundësi atentati. Vëmendja është përqendruar vetëm
tek shpejtësia e trenit, që udhëtonte me 180 km në orë. Gjatë gjithë natës në zonën
e tragjedisë vijoi puna për nxjerrjen e trupave nga vagonat, kthyer në gërmadhë, dhe
për sigurimin e gjakut, aq të nevojshëm, në ndihmë të të plagosurve. Sot paradite,
në vendin e ngjarjes ishte edhe kryeministri spanjoll, Mariano Rajoy, i lindur pikërisht
në Santiago, ndërsa administrata e qytetit i anuloi të gjitha festimet e parashikuara.
E natyrshme. Në tren ishin shumë shtegtarë, që do të merrnin pjesë pikërisht në këto
kremtime, në se nuk do të kishin gjetur vdekjen para se të arrinin. E Papa
Françesku e mori menjëherë lajmin e hidhur, na njofton, nga Rio, drejtori i Sallës
së Shtypit të Vatikanit, atë Federiko Lombardi: “U informua sonte. I dhashë
disa njoftime përmes bashkëpunëtorëve të grupit shoqërues. E di, pastaj se kardinali
Rouko i telefonoi personalisht. Kardinali Rouko ka qenë për shumë kohë kryeipeshkëv
i Santiagos dhe i Rajonit e, prej këndej, e ndjen tmerrësisht këtë aksident. Deshi
të fliste me Papën me gjithë zemër”.