Папа ў Апарэсідзе: зварот да ідалаў – вынік пачуцця адзіноты і пустаты
Святы Айцец, у рамках
свайго візіту ў Бразілію, наведаў 24 ліпеня марыйны санктуарый у Апарэсідзе. Як ён
сам заўважыў, гэта месца мае для яго важнае значэнне, паколькі менавіта тут нарадзіўся
“Дакумент з Апарэсіды”, які “паўстаў са спляцення сустрэчы біскупаў і простай веры
пілігрымаў, пад матчынай апекай Марыі”. Пантыфік узначаліў у санктуарыі св. Імшу,
падчас якой нагадаў, што мэтай яго прыбыцця ў Бразілію з’яўляюцца Сусветныя дні моладзі.
Папа, як прызнаўся ён сам, прыбыў таксама, “каб пастукаць у дзверы дома Марыі – якая
любіла і выхоўвала Езуса – просячы, каб дапамагала нам усім: пастырам Божага Люду,
бацькам і настаўнікам, у перадачы нашай моладзі тых каштоўнасцяў, якія зробяць яе
стваральнікамі народу і свету больш справядлівага, салідарнага і братэрскага”. Францішак
засяродзіўся на “трох простых паставах”, якія павінен культываваць сучасны хрысціянін:
захаванні надзеі, дазволе Богу здзіўляць і радасці жыцця.
Папа не хаваў, што
“існуе шмат цяжкасцяў у жыцці кожнага з нас, нашых людзей, нашых супольнасцяў”. Але
якімі б вялікімі яны ні здаваліся, Бог ніколі не дазваляе, каб гэтыя цяжкасці нас
знішчылі, заўважыў ён. “Што тычыцца расчаравання, якое можа адбыцца ў жыцці тых, хто
ўдзельнічае ў евангелізацыі або хто спрабуе жыць паводле веры, як бацька і маці сямейства,
я хацеў бы рашуча сказаць: няхай у вашым сэрцы будзе ўпэўненасць, што Бог ідзе з вамі,
ніколі вас не пакідае! Не губляйце надзеі!”, - заклікаў Францішак. Папа прызнаў, што
“зло існуе ў нашай гісторыі”, але не яно самае моцнае. “Самым моцным з’яўляецца Бог,
і Бог ёсць наша надзея!”, - падкрэсліў ён. Святы Айцец з жалем адзначыў, што сёння
“моладзь часта зачараваная шматлікімі ідаламі, якія занялі месца Бога і, здаецца,
даюць надзею: грошы, поспех, уладу, задавальненне”. Але на самой справе гэта з’ява
– вынік “пачуцця адзіноты і пустаты”, якія пранізваюць сэрцы многіх людзей і прыводзяць
да пошуку кампенсацыі ў выглядзе такіх ідалаў.
Папа заўважыў, што Бог дзейнічае
і здзіўляе нас, “нават ва ўмовах цяжкасцяў”. Прыкладам можа служыць гісторыя санктуарыя
ў Апарэсідзе: тры рыбакі пасля бясплённага дня, калі нічога не злавілі ў водах Парнаібы,
знайшлі нешта зусім нечаканае: статую Маці Божай Беззаганна Зачатай. “Бог па-ранейшаму
здзіўляе, як новае віно ў Евангеллі”, - падкрэсліў Францішак і дадаў, што “Бог захоўвае
для нас заўсёды найлепшае” і хоча, каб мы дазволілі Яго любові здзіўляць нас, прымалі
нечаканасці з Яго боку. Папа заклікаў “давяраць Богу”.
“Хрысціянін – радасны,
ніколі не сумны”, - падкрэсліў Святы Айцец падчас сваёй гаміліі, і матыў гэтага –
пачуццё пастаяннай прысутнасці Бога, адчуванне Яго любові. “Хрысціянін не можа быць
песімістам!”, - сказаў Папа, ён не можа выглядаць “як чалавек, які, здаецца, знаходзіцца
пастаянна ў жалобе”. “Калі мы сапраўды закаханыя ў Хрыста і адчуваем, як вельмі Ён
нас любіць, наша сэрца “запаліцца” настолькі вялікай радасцю, што яна перадасца тым,
якія жывуць побач з намі”, - сказаў з упэўненасцю папа Францішак.
24 ліпеня
вечарам, пасля свайго вяртання з Апарэсіды, Святы Айцец наведае шпіталь імя св. Францішка
Асізскага, які спецыялізуецца на лячэнні пыцыентаў з рознымі відамі залежнасці, перш
за ўсё, алкагольнай і наркатычнай. Папа адкрые новае аддзяленне, у якім будуць праходзіць
лячэнне маладыя нарказалежныя пацыенты.