22 ліпеня пачалося
першае Апостальскае падарожжа Святога Айца па-за межы Італіі. Папа Францішак ў 8
гадзін 53 хвіліны па рымскім часе ўзняўся на аэробусе А 330 кампаніі “Аlitalia” з
рымскага аэрапорта “Ф’юмічына” ў накірунку Бразіліі. Прадбачана, што самалёт прызямліцца
ў міжнародням аэрапорце Рыа дэ Жанейра “Галеан” ў 16 гадзін па мясцовым часе (22.00
у Беларусі).Візіт Францішка ў Бразілію выклікае асаблівую цікавасць яшчэ і таму, што
ён з'яўляецца першым Папам-лацінаамерыканцам у шматвекавой гісторыі Рыма-каталіцкага
Касцёла.
Праграма візіту вельмі насычаная. Чакаецца, што на мерапрыемствах Сусветных дзён моладзі
з удзелам Пантыфіка будуць прысутнічаць больш за 2 мільёны юнакоў і дзяўчат з цэлага
свету, сярод якіх – і беларусы. Найбольш яркімі момантамі стануць сустрэчы Францішка
з моладдзю на пляжы Копакабана ў Рыа-дэ-Жанейра, яго візіт у базіліку Найсвяцейшай
Панны Марыі ў Апарэсідзе. Цэнтральным пунктам заакіянскага Апостальскага падарожжа
і ўдзелу Папы Францішка у ХХVІІІ Сусветных днях моладзі стане начное чуванне і дыялог
з моладдзю і заключная св. Імша ў Гуараціба. Не забытыя ў праграме Папы Касцёла
“беднага дзеля бедных” таксама наведанні шпіталю з адкрыццём там цэнтру для лячэння
наркаманаў; адной з самых буйных са шматлікіх у Бразіліі і іншых лацінаамерыканскіх
краінах фавэл (трушчоб); сустрэча з вязнямі ў турме. Папа вернецца ў Рым 29 ліпеня.