Бразільскі іерарх: краіна з нецярплівасцю чакае візіту Папы
Бразілія жыве чаканнем
візіту Францшка; цікавасць у першую чаргу звязана з тым, што гэта першы Папа з Лацінскай
Амерыкі, а таксама першы, які прыняў сімвалічнае імя Францішак, так дарагое для веруючых
і няверуючых, сказаў у інтэрв’ю “L’Osservatore Romano” кардынал Раймунду Дамасэну
Ассіс. Старшыня Канферэнцыі Біскупаў Бразіліі падкрэсліў, што ўсмешка і прастата Святога
Айца, яго блізкасць да бедных і памяць пра іх паспрыялі таму, што Пантыфік стаў пастырам,
поўным энтузіязму і любові да сваіх авечак. “Яго словы, простыя і непасрэдныя, напоўненыя
вялікім душпастырскім клопатам, глыбока пранікаюць ў сэрцы асоб, яны прызнаюць іх,
таму што тычацца іх штодзённага жыцця”, - сказаў іерарх. Паводле яго, свабода, з якой
Папа прамаўляе іх, нічога не адбіраючы з іх яснасці, глыбіні і сілы, дае Касцёлу новую
энергію і спрыяе абнаўленню веры. У Рыа-дэ-Жанейра, падкрэсліў кардынал, моладзь з
усяго свету будзе мець магчымасць яшчэ больш наблізіцца да Францішка, каб зачэрпнуць
з духоўнасці, якая зыходзіць з яго жэстаў і слоў.
Арцыбіскуп Апарэсіды лічыць,
што візіт Святога Айца ў яго краіну, безумоўна, паспрыяе новаму размаху евангелізацыі
сярод моладзі, якая знаходзіцца ў цэнтры ўвагі Касцёла ў Бразіліі ў апошнія гады.
“Хаця ёсць шмат актыўных маладых людзей ў нашых каталіцкіх супольнасцях, аднак турбуе
і тое, чаму некаторыя з іх адышлі ад Касцёла”, - адзначыў пурпурат і дадаў, што іх
адыход не значыць, што яны перасталі верыць у Бога. Вера ўсё яшчэ жывая ў іх сэрцах,
але яны больш не адчуваюць патрэбы пасрэдніцтва Касцёла, каб жыць ёю і даваць сваё
сведчанне. “У абліччы сітуацыі цярпення, ў якім апынуліся шматлікія жыхары краіны,
моладзь не заразілася культурай дабрабыту, якая вядзе да абыякавасці да бліжняга,
аб чым узгадаў Папа падчас нядаўняга візіту на італьянскую Лампедузу”, - запэўніў
кардынал Раймунду Дамасэну Ассіс.