Սփիւռքի Նախարարը Սուրիահայերու Հարցերու Լուծման Աջակցելու Խնդրագիր Ներկայացուցած Է
Հայաստանի Մէջ ԵՄ Պատուիրակութեան Ղեկավարին
Հայաստանի սփիւռքի նախարար Հրանոյշ Յակոբեանի հրաւէրով Յուլիսին տեղի ունեցած է Հայաստանի
մէջ Եւրոպական Միութեան պատուիրակութեան ղեկավար, դեսպան Թրայան Հրիսթէայի հետ հանդիպում
մը: Այս մասին կը յայտնէ Սփիւռքի նախարարութեան մամլոյ եւ հասարակութեան հետ կապերու
վարչութիւնը։ Աղբիւրի համաձայն սփիւռքի նախարարը ներկայացուցած է Սուրիոյ քաղաքացիական
պատերազմին պատճառով Հայաստան տեղափոխուած հայերուն հիմնախնդիրներուն լուծման գծով Հայաստանի
իշխանութիւններուն դիրքորոշումն ու իրականացուցած ծրագիրները: Նախարարը յատկապէս անդրադարձած
է Հայաստանի իրաւական դաշտին մէջ կատարուած փոփոխութիւններուն` կրթութեան, առողջապահութեան,
գործարարութեան ոլորտներուն մէջ, ինչպէս նաեւ` աշխատանքով եւ կացարաններով ապահովման
ուղղութեամբ կատարուած աշխատանքներուն: Հ. Յակոբեան ներկայացուցած է Աշտարակ քաղաքին
մէջ Նոր Հալէպ թաղամասի հիմնադրման ծրագիրը: Հայաստանի սփիւռքի նախարարը յատկապէս
լուսարձակի տակ առած է նաեւ այն հանգամանքը, որ Հայաստանի մէջ սուրիահայերուն աջակցութեան
ծրագիրները` 2012-2013-ին, հիմնականօրէն իրականացուած են պետական պիւտճէով եւ համահայկական
կազմակերպութիւններու աջակցութեամբ. ան դիմած է Եւրոպական Միութեան պատուիրակութեան ղեկավարին`
Հայաստան տեղափոխուած սուրիահայերուն հիմնախնդիրներու լուծման ծրագիրները, մասնաւորաբար
բնակարանաշինութեան ծրագիրը Եւրոպական Միութեան կողմէ ֆինանսաւորելու խնդրանքով` քաղաքացիական
պատերազմին պատճառով հարկադրաբար իրենց երկրէն այլ պետութիւններ արտագաղթած Սուրիոյ քաղաքացիներուն
յատկացուող հսկայական գումարներու ծիրին մէջ: Հրանոյշ Յակոբեան Թրայան Հրիսթէային
յանձնած է նաեւ տեղեկագիր` սուրիահայերուն հիմնախնդիրներու լուծման ուղղութեամբ իրականացուող
աշխատանքներուն, առկայ հիմնախնդիրներուն եւ անոնց լուծման հոլովոյթներուն վերաբերեալ,
ինչպէս նաեւ` աջակցութեան խնդրանքով գրութիւն: Յաջորդ կարեւոր հարցը, որուն անդրադարձած
է նախարարը, Սուրիոյ եւ յատկապէս Հալէպի մէջ տիրող ճգնաժամային իրավիճակն է: Երկրին երբեմնի
տնտեսական մայրաքաղաքը մօտ 10 օրէ կը գտնուի շրջափակման մէջ, հոսանքազրկուած է, կայ սննդամթերքի,
դեղօրայքի պակաս: Քաղաքի բնակիչները կրնան սովի մատնուիլ, ուստի վտանգուած է քաղաքացիներուն,
որոնց կարգին հայութեան ֆիզիքական գոյութիւնը: Նախարարը դիմած է Թրայան Հրիսթէային`
խնդրելով բարձրացնել Հալէպի շրջափակման վերացման, երկրին մէջ կայունութեան հաստատման
հարցերը, ինչպէս նաեւ` մարդասիրական օգնութիւնը Սուրիոյ խաղաղ բնակչութեան հասցնելու
անհրաժեշտութիւնը Եւրոպական Միութեան անդամ երկիրներուն եւ միջազգային կառոյցներուն առջեւ: Եւրոպական
Միութեան պատուիրակութեան ղեկավարը իր կարեկցանքը յայտնած է ստեղծուած իրավիճակին վերաբերեալ
եւ պատրաստակամութիւն յայտնած է նշեալ խնդիրները արծարծելու համապատասխան մարմիններուն
մէջ: