Աշխարհի Բնակչութեան Թիւը 21-րդ Դարու Վերջը Պիտի Կազմէ Մօտ 11 Միլիառ Մարդ
Աշխարհի բնակչութեան թիւը 2100 թուականին պիտի կազմէ մօտ 11 միլիառ մարդ, որ մօտ 8%-ով`
800 միլիոնով աւելի է, քան կախատեսած են ՄԱԿ-ի փորձագէտները 2011-ին: Այս մասին կը հաղորդէ
parmenian.net-ը՝ յղում կատարելով Ուաշինկթընի համալսարանի փորձագէտներու համապատասխան
զեկոյցին: Աղբիւրը կը տեղեկացնէ, որ Ուաշինկթընի համալսարանի տուեալներով` աշխարհի
մէջ բնակչութեան թիւի աճը պայմանաւորուած է Ափրիկէի ծնելիութեան աճով: «Ափրիկէի մէջ
ծնելիութեան անկումը դանդաղած է կամ կանգ առած է աւելի երկար ժամանակով, քան մենք կը
կանխատեսէինք նախապէս: Այդ տարածաշրջանին մէջ բնակչութեան թիւը պիտի աճի»,- նշուած է
Ուաշինկթընի համալսարանի զեկոյցին մէջ: Ներկայիս Ափրիկէի բնակչութիւնը կը կազմէ 1,1
միլիառ մարդ, եւ կը սպասէ, որ 2100 թուականին ան կը հասնի 4,2 միլիառ: Ինչ կը վերաբերի
միւս աշխարհամասերուն, ապա կը սպասուի աննշան փոփոխութիւններ: Եւրոպայի բնակչութեան թիւը
կրնայ նուազիլ, քանի որ ծնելիութիւնը առաջուան պէս կը շարունակուի բնակչութեան վերարտադրութեան
համար պահանջուող մակարդակէն ցած մնալ: Այլ պետութիւններու բնակչութեան թիւը կրնայ քիչ
մը աւելնալ` պայմանաւորուած կեանքի տեւողութեան աճով: «Այս տուեալները ցոյց կու տան,
որ անհրաժեշտ է վերանայիլ ընտանիքներու ծրագրաւորման քաղաքականութիւնը եւ աղջիկներու
համար կրթութեան մատչելիութիւնը, որպէսզի հնարաւոր ըլլայ լուծել Ափրիկէի մէջ բնակչութեան
արագ աճի խնդիրը»,-նշած է Ուաշինկթընի համալսարանի վիճակագրութեան եւ ընկերաբանութեան
փրոֆէսոր Ատրիըն Ռեֆթըրին: Նշենք, որ 2011-ին աշխարհի բնակչութեան թիւը կազմած է մօտ
7 միլիառ մարդ, իսկ 1999-ին եղած է մօտ 6 միլիառ: