Papa në Engjëllin e Tënzot: Zoti dëshiron mëshirë, më shumë se fli. Një mendim për
Shën Kamilin, DBR-së e Festën e Kastel Gandolfos
Samaritan i mirë është ai, që vë në jetë vullnetin e Zotit, duke u kujdesur, jo me
fjalë, por me vepra për të afërmin. Kështu u shpreh Papa Françesku në lutjen e sotme
të Engjëllit të Tënzot. Papa kujtoi mësimin e shembëlltyrës së Ungjillit, duke nënvizuar
se “zemra e samaritanit është e mirë e bujare” e duke pohuar se ai pati dhembshuri
e mëshirë. Më pas Ati i Shenjtë kujtoi figurën e Shën Kamilit, pikërisht sot, që hapen
kremtimet për 400-vjetorin e vdekjes së Shenjtit. Më pas, mendimi i Françeskut shkoi
shumë larg, në Brazil, ku pas pak ditësh do të jetë në mes të të rinjve të mbarë botës,
e në Volinia të Ukrainës, ku u përkujtua 70-vjetori i masakrës, që tronditi rëndë
dy popuj, atë polak e atë ukrainas.
“Hyji do mëshirë, më shumë se fli”: këtë
theksoi Papa, duke reflektuar mbi shembëlltyrën e Samaritanit të Mirë që, shpjegoi,
është shembull dashurie për të afërmin. Samaritani pati mëshirë për njeriun e grabitur
e të dërmuar, vijoi Papa, duke përsëritur me ngulm: “Pati mëshirë”. E Ati i Shenjtë
na kërkon të reflektojmë mbi sjelljen e samaritanit, protagonist i shembëlltyrës: “Samaritanët
përbuzeshin nga Judenjtë, për shkak të traditave të ndryshme fetare; e pra Jezusi
na bën të shikojmë se zemra e këtij samaritani është e mirë, e fisme, bujare e se,
ndryshe nga prifti e leviti, ai e vë në jetë vullnetin e Zotit, që do mëshirë, më
shumë se fli”. Pastaj Papa shtoi, jashtë tekstit: “Zoti e do gjithnjë
këtë: dëshiron të jemi të mëshirshëm e të mos shkojmë duke dënuar gjithë botën, jo!
Mëshirën e zemrës, do, sepse ai vetë është i gjithëmëshirshëm. Ai di t’i kuptojë mjerimet
tona, vështirësitë tona edhe mëkatet tona. Na jep të gjithëve zemër të ndjeshme,
për të bërë atë, që bëri Samaritani, i cili imiton pikërisht mëshirën e Hyjit, mëshirën
për njeriun në çaste të vështira”. Samaritani është shembull i dashurisë
për të afërmin, vijoi Papa Françesku i cili, në këtë lutje të Engjëllit të Tënzot,
përshëndeti edhe banorët e “kësaj qyteze të bukur”, siç e quajti ai vetë, duke i falënderuar
të gjithë, banorë e shtegtarë, për lutjet. Nënvizoi, më pas, se pikërisht sot Kisha
përkujton Shën Kamilin de Lelis, themelues i Shërbëtorëve të të Sëmurëve, pajtor i
tyre dhe i punonjësve të shëndetësisë, që vdiq më 14 korrik 1614. E pikërisht sot
u hapën kremtimet për 400-vjetorin e vdekjes së tij, që do të arrijë kulmin pas një
viti: “Përshëndes me shumë dashuri bijtë e bijat shpirtërore të Shën
Kamilit, që jetojnë karizmën e tij të mëshirës, në lidhje të ngushtë e të përditshme
me të sëmurët. Të jeni si samaritani i mirë! E edhe mjekët, infermierët e të gjithë
ata, që punojnë në spitale e në shtëpitë e mjekimit i uroj të frymëzohen nga i njëjti
shpirt”. Pastaj, lutja Zojës së Bekuar, duke i kërkuar t’i marrë krahë
të rinjtë, që do të mblidhen nga mbarë bota në Brazil, në emër të Birit të saj Hyjnor; “Të
lutemi, pra, për këtë shtegtim të madh, që Zoja e Aparesidës, Pajtore e Brazilit,
t’u prijë hapave të pjesëmarrëve e t’ua hapë zemrat, për ta pranuar misionin, që do
t’u besojë Krishti”. Një mendim tjetër, i improvizuar, simpatik: “Po
shikoj se ka shumë të rinj në moshë, pa dyshuar se të gjithë e keni zemrën të re,
eh? Epo, përgëzime!”. Pas lutjes mariane, Papa u ndalua disa çaste tek
70-vjetori i masakrës së Volinës, që u kujtua sot edhe në Meshën e kremtuar në katedralen
e Lutskut. Akte të tilla, tha Papa, shkaktuar nga ideologjia nacionaliste, në rrethanat
tragjike të Luftës II Botëore, shkaktuan dhjetra mijëra viktima e plagosën rëndë vëllazërinë
ndërmjet dy popujve, atij polak e ukrainas: “Ia besoj mëshirës së Zotit shpirtrat
e viktimave e, për popujt e tyre, kërkoj hirin e pajtimit të plotë e një ardhmëri
të qetë, plot shpresë e bashkëpunim për ndërtimin e Mbretërisë së Hyjit”. Një
përshëndetje e veçantë ajo, drejtuar besimtarëve të dioqezës së Albanos, të cilëve
u kujtoi festën e 15 korrikut, përkujtimin e Shën Bonaventurës, pajtor i Albanos,
pasuar nga fjalë plot dashuri e nga urimi … “Që festa e nesërme të jetë
e bukur, e urime. Po do të kisha dëshirë t’ju dërgoja një tortë, por… por… nuk e di
në se e bëjnë aq të madhe…”. Shumë përshëndetje të tjera, pastaj. Drejtuar
pjesëmarrësve në shtegtimin e Familjes së Radio Marisë në Jasna Gora, Çestokova; shtegtarëve
të tjerë, grupeve famullitare; familjeve, të rinjve, e posaçërisht atyre, që kishin
ardhur nga Irlanda si dhe të rinjve të shurdhër, ardhur në Romë për një takim ndërkombëtar; murgeshave
të Zemrës së Krishtit, me familje në kombe të ndryshme; Bijave të Dashurisë Hyjnore,
mbledhur në Kapitullin e përgjithshëm, Eproret e Bijave të Marisë Ndihmëtare...Të
gjithë morën nga Papa urimin: “Javë të gëzuar e drekën e mirë!”.