ՄԱԿ Ընդունած Է Քիմիական Զէնքի Օգտագործման Հարցերը Քննարկելու Դամասկոսի Հրաւէրը
ԻԹԱՐ-ԹԱՍՍ կը հաղորդէ, որ ՄԱԿ-ի մամլոյ ծառայութիւնը յայտնած է, որ ՄԱԿ-ի ներկայացուցիչները
ընդունած են Սուրիոյ կառավարութեան հրաւէրը` քիմիական զէնքի օգտագործման հարցերը Դամասկոսի
մէջ քննարկելու համար: Սուրիոյ կառավարութեան հետ բանակցութիւններ կատարելու համար
պիտի մեկնին ՄԱԿ-ի` Սուրիոյ մէջ քիմիական զէնքի հաւանական օգտագործումը հետաքննող առաքելութեան
ղեկավար Օքէ Սելլսթրեմ եւ զինաթափման հարցերով բարձրագոյն ներկայացուցիչ Անճելա Քէյն: Կը
նախատեսուի, որ բանակցութիւններուն ընթացքին անոնք Սուրիոյ իշխանութիւններուն հետ քննարկեն
տագնապին ընթացքին քիմիական զէնքի օգտագործման դէպքերու ուսումնասիրութեան հարցերը` ՄԱԿ-ի
հովանիին տակ: 9 յուլիսին ՄԱԿ-ի մէջ Ռուսիոյ ներկայացուցիչ Վիթալի Չուրքին յայտարարած
էր, որ Ռուսիոյ փորձագէտները դէպքերը վերլուծելով եկած են այն եզրակացութեան, որ զինեալ
ընդդիմադիրները 2013-ի գարնան Հալէպի մօտ քիմիական զէնք օգտագործած են: Չինաստանի
արտաքին գործոց նախարարութեան բանբեր Հուա Շունիեյինկ կոչ ուղղեց «Սուրիոյ մէջ անմիջապէս
զինադադարի հաստատման»` սուրիական կողմերուն դարձեալ կոչ ուղղելով ընդառաջելու Ժընեւի
մէջ բանակցութիւններու հրաւէրներուն: Միւս կողմէ, Իսրայէլի պաշտպանութեան նախկին նախարար
Պենիամին պեն Էլիազար յայտնեց, որ իսրայէլեան բանակը կատարելապէս պատրաստ պէտք է ըլլայ,
մասնաւորաբար ներկայ հանգրուանին, որ Եգիպտոսի եւ Սուրիոյ մէջ տեղի ունեցող դէպքերուն
լոյսին տակ անորոշութեամբ կը բնորոշուի: Ան նաեւ պահանջեց «իսրայէլեան բանակի ծախսերը
կրճատել»: