Апостальская Пэнітэнцыярыя: поўны адпуст для ўдзельнікаў СДМ у Рыа
Апостальская Пэнітэнцыярыя
паведаміла 9 ліпеня аб рашэнні Святога Айца даць магчымасць атрымання поўнага і частковага
адпустаў вернікам, якія прымуць удзел у XXVIII Сусветных днях моладзі ў Рыа-дэ-Жанейра
з 22 па 29 ліпеня. На аўдыенцыі для Вялікага пэнітэнцыярыя 3 чэрвеня Пантыфік зацвердзіў
умовы іх атрымання. Такім чынам, поўны адпуст можна атрымаць адзін раз у дзень пры
звычайных умовах – сакрамэнтальная споведзь, прыняцце св. Камуніі і малітва ў інтэнцыях
Святога Айца. Прычым, вернік павінен адзначацца сапраўдным раскаяннем і пакорай, аддана
браць удзел у святых абрадах і рэлігійных практыках, якія пройдуць у Рыа-дэ-Жанейра.
Адпуст можна ахвяраваць як за сябе, так і за душы памерлых вернікаў.
Таксама
католікі, якія не змогуць прыехаць у Рыа, але будуць прымаць удзел у абрадах і рэлігійных
практыках пасродкам тэлебачання, радыё, або сучасных медыя з 22 па 29 ліпеня, маюць
магчымасць атрымаць поўны адпуст шляхам выканання звычайных духоўных, сакраментальных
і малітоўных умоў, аб якіх было ўзгадана вышэй.
Частковы адпуст, паводле дэкрэту
Апостальскай Пэнітэнцыярыі, могуць атрымаць усе вернікі, дзе б яны не знаходзіліся
падчас моладзевага форуму, калі, прынамсі ў духу, яны ўзнясуць сваю малітву да Бога,
заканчваючы яе афіцыйнай малітвай Сусветных дзён моладзі і заклікам да Найсвяцейшай
Панны Марыя, Каралевы Бразіліі, а таксама іншых апекуноў і заступнікаў сустрэчы.
Для
таго, каб вернікі мелі большую магчымасць атрымаць адпусты, Апостальская Пенітэнцыярыя
заклікае святароў зрабіць больш даступным іх удзел у сакрамэнце пакаяння.