Кардынал Таран сустрэўся з Міністрам замежных спраў Беларусі

8 ліпеня старшыня Папскай рады па міжрэлігійным дыялогу, кардынал Жан-Луі Таран, сустрэўся з Міністрам замежных спраў Беларусi Уладзімірам Макеем. У сустрэчы прымаў удзел Апостальскі Нунцый у Беларусі арцыбіскуп Клаўдыё Гуджэроцці. Як паведамляе прэс-служба Міністэрства замежных спраў Рэспублікі Беларусь, у ходзе сустрэчы суразмоўцы абмеркавалі актуальны стан беларуска-ватыканскага супрацоўніцтва і перспектывы яго далейшага ўмацавання.

Трэба нагадаць, што 4 ліпеня адбылася сустрэча кардынала Жана-Луі Тарана з Прэзідэнтам Беларусі Аляксандрам Лукашэнкам. У той жа дзень легат Папы прысутнічаў на ўрачыстым прыёме ў Мінску з удзелам прадстаўнікоў ураду Рэспублікі Беларусь, прадстаўнікоў дыпламатычнага корпусу, хрысціянскіх канфесій і іншых рэлігій.

Сёння ватыканскі іерарх, які знаходзіўся ў Беларусі як легат Святога Айца Францішка на юбілейныя ўрачыстасці ў Будславе, закончыў свой візіт у краіне.