Пантыфік: ніколі не забыцца першай сустрэчы з Хрыстом

Сэрцам Божага паслання з’яўляецца міласэрнасць, перакананы папа Францішак. 5 ліпеня падчас ранішняй Эўхарыстыі ён засяродзіўся над фрагментам Евангелля пра пакліканне Мацвея. “Міласэрнасці хачу, а не ахвяры”, - паўтарыў Папа словы Езуса да фарысеяў, якія крытыкавалі Збаўцу, што Ён есць з грэшнікамі. Мытнікі, - патлумачыў Пантыфік - былі асаблівымі грэшнікамі, нават здраднікамі, бо збіралі падаткі ад свайго народа для рымлян. А Езус, сустракаючы мытніка Мацвея, глядзіць на яго з міласэрнасцю. Менавіта гэта дапамагло чалавеку, так прывязанаму да грошай, кінуць усё і пайсці за Хрыстом. Мацвей прыняў “гэты час міласэрнасці”.

Езус не спыняецца на прабачэнні грахоў, ён святкуе з грэшнікамі за адным сталом. Гэта свята Божай міласэрнасці, якая змяняе жыццё, заўважыў Францішак. Але пасля гэтага свята наступае “штодзённая праца”, дадаў Папа. Гэта праца павінна чэрпаць энергію з той першай сустрэчы, таго свята. Мы ніколі не можам забыцца той першай сустрэчы з Хрыстом, якая змяніла наша жыццё, сказаў Пантыфік.

У евангельскай прыпавесці гаворыцца пра адмову многіх запрошаныя на свята Пана. Таму Езус хадзіў, “шукаючы бедных, хворых, і святкаваў з імі”. Езус ідзе далей, ён святкуе таксама і з грэшнікамі. Ён не хацеў “варыцца ва ўласным соку”, Ён прыйшоў да нас, грэшнікаў, нагадаў Папа і заклікаў ніколі не забывацца і цаніць гэта.