Кардынал Таран у Беларусі: у дыпламатыі на першым месцы не дзяржава, а чалавек
4 ліпеня кардынал
Жан-Луі Таран, старшыня Папскай рады па міжрэлігійным дыялогу, які прыбыў у якасці
спецыяльнага легата Святога Айца Францішка на юбілейныя ўрачыстасці ў Будславе, сустрэўся
з Мітрапалітам Мінскім і Слуцкім Філарэтам, Патрыяршым Экзархам усяе Беларусі. Сустрэча
прайшла ў Мінскім Епархіяльным упраўленні. Як паведамляе афіцыйны партал Беларускай
Праваслаўнай Царквы, падчас размовы кардынала з Мітрапалітам Філарэтам было, у прыватнасці,
закранута пытанне дзяржаўна-царкоўных адносін у Беларусі. Легат адзначыў, што бачыць
добрую волю беларускіх уладаў і асабіста Прэзідэнта да ўзаемавыгаднага супрацоўніцтва
з канфесіямі. Суразмоўцы абмеркавалі таксама стан і перспектывы дыялога Каталіцкага
Касцёла і Рускай Праваслаўнай Царквы.
Таксама 4 ліпеня ў Мінску адбыўся ўрачысты
прыём у гонар прыбыцця ў Беларусь старшыні Папскай рады па міжрэлігійным дыялогу,
на якім прысутнічалі прадстаўнікі ўраду Беларусі, дыпламатычнага корпусу, хрысціянскіх
канфесій і іншых рэлігій. Падчас вайго выступлення кардынал Таран звярнуў увагу на
значэнне сучаснай дыпламатыі. Па словах іерарха, “калі на працягу многіх стагоддзяў
дыпламатыя займалася пытаннямі вайны і міру, то сёння, са з’яўленнем паняцця “чалавечнасць”,
яна перш за ўсё праяўляе клопат аб чалавечай асобе і яе правах”, “рашаючую ролю адыгрывае
ўжо не дзяржава, заклапочаная сваімі інтарэсамі, а чалавечая асоба”.
Дыпламатыя
Святога Пасаду, заўважыў легат, якога цытуе catholic.by, “заўсёды імкнецца зразумець
каштоўнасці розных народаў, паважаць іх гісторыю і заклікаць да дыялога”. Рэлігіі,
як адзначыў кардынал, “з’яўляюцца часткай тых “глыбінных сілаў”, якія неабходна ўлічваць
пры “добраўпарадкаванні” жыцця народаў”, бо рэлігіі, міжнацыянальныя па сутнасці,
“пераадольваюць межы, прабуджаюць салідарнасць і нараджаюць адносіны паміж культурамі
і грамадствамі”.