Dy Papë ia kushtojnë Shtetin e Vatikanit Shën Jozefit dhe Shën Mëhillit Kryeengjëll
Sot paradite, në orën 8.45, në Kopshtet e Vatikanit, pranë Pallatit të Guvernatoratit,
në praninë e dy papëve, të Papës Françesku e të Papës së nderit, Benedikti XVI, Shteti
i Vatikanit iu kushtua Shën Jozefit dhe Shën Mëhillit Kryeengjëll, si edhe u përurua
një monument për Shën Mëhillin Kryeengjëll. Pak para se të fillonte ceremonia,
sqaron një notë e drejtorit të Sallës së Shtypit të Selisë së Shenjtë, atë Federiko
Lombardi, erdhi në atë vend, Papa i nderit, Benedikti XVI, i ftuar nga Papa Françesku.
U përshendet me të pranishmit e më pas u përqafua edhe me Papën Bergolio, që erdhi
disa minuta më vonë e që mbeti gjatë gjithë ceremonisë pranë Jozef Racinger, në dy
karrige të vendosura afër, përpara monumentit. Pas përshëndetjes së shkurtër të
kardinalit Xhuzepe Bertelo, President i Guvernatoratit, foli ish-kreu i tij, kardinali
Xhovani Lajolo, i cili nënvizoi domethënien e monumentit të ri dhe të shatërvanit,
kushtuar Shën Jozefit, vendosur në anën tjetër të Pallatit të Guvernatoratit e përuruar
pak kohë më parë. Në aktin e kushtimit, Papa Françesku ia besoi Shën Jozefit shpresat
e Kishës Katolike dhe iu lut Shën Mëhillit Kryeengjëll të vigjëlojë mbi Selinë Apostolike
e ta mbrojë Kishën nga çdo intrigë, që kërcënon qetësinë e saj. Iu lut gjithashtu
t’i bëjë njerëzit ta fitojnë betejën kundër tundimit të pushtetit, të pasurisë e të
shthurjes. Ndër të pranishmit, edhe artistët autorë të monumentit të ri e të shatërvanit
të Shën Jozefit, përkatësisht Xhuzepe Antonio Lomusho dhe Franko Murer, si edhe bamirësit,
që mundësuan realizimin e tyre.