Беларусь змагла забяспечыць
міжканфесійныя мір і згоду. Аб гэтым заявіў сёння Аляксандр Лукашэнка на сустрэчы
са старшынёй Папскай рады па міжрэлігійным дыялогу, кардыналам Жан-Луі Таранам, перадае
“БЕЛТА”. На думку Прэзідэнта, у Беларусі няма праблем ва ўзаемаадносінах дзяржавы
і Каталіцкага Касцёла. Ён запэўніў, што каталіцкая канфесія, як і раней, будзе займаць
годнае месца ў краіне. Кардынал Таран прыбыў на святкаванне 400-годдзя знаходжання
іконы Маці Божай у Будславе ў якасці Папскага легата. Урачыстасці пройдуць у нацыянальным
санктуарыі 5-6 ліпеня.
“Мне прыемна бачыць Вас у Беларусі, і я вітаю вас на
нашай беларускай зямлі. Вельмі спадзяюся, што Ваша знаходжанне ў Беларусі будзе паспяховым
і што пытанняў для перажыванняў і хваляванняў, якія б выклікалі дадатковыя праблемы,
у нас сёння няма”, - падкрэсліў Аляксандр Лукашэнка. Ён падзяліўся, што ў Беларусі
забяспечаны міжканфесійны мір і стабільнасць. “Мяне задавальняе, што дзве вядучыя
Цэрквы (Праваслаўная і Каталіцкая) знайшлі шляхі, па якіх могуць развіваць супрацоўніцтва”,
- сказаў Прэзідэнт, характэрызуючы гэтыя адносіны як канструктыўныя і карысныя для
дзяржавы.
На думку кіраўніка краіны, у апошні час шмат зроблена для Цэркваў,
у тым ліку Рыма-каталіцкай. Так, нядаўна было прынята рашэнне аб будаўніцтве каталіцкага
духоўна-адукацыйнага цэнтра. “Невырашальных пытанняў у нас няма. - заявіў Аляксандр
Лукашэнка - Я хацеў бы запэўніць вас і папрашу перадаць Папе Рымскаму, што каталіцкая
канфесія, як і раней, будзе займаць годнае месца ў Беларусі”. Пры гэтым кіраўнік дзяржавы
падкрэсліў, што грамадзяне Беларусі маюць і будуць мець поўны доступ да рэалізацыі
сваіх рэлігійных перакананняў.
Папскі легат перадаў найлепшыя пажаданні ад
папы Францішка і благаслаўленне ўсяму беларускаму народу. Кардынал Жан-Луі Таран адзначыў,
што цяперашні візіт з’яўляецца яго “першай паездкай у Беларусь”. “Мне цікава на месцы
азнаёміцца з рэаліямі, паглядзець, як адбываецца дыялог канфесій”, - цытуе іерарха
“Інтэрфакс”. “Як важна, калі існуе добры кантакт паміж прадстаўнікамі канфесій і прадстаўнікамі
дзяржавы”, - дадаў старшыня Папскай рады па міжрэлігійным дыялогу. “Таму мне прыемна
чуць вашы словы, што ўсе канфесіі знайшлі ў Беларусі дом, каб магчы размаўляць, супрацоўнічаць
адзін з адным і жыць у згодзе”, - падкрэсліў Папскі легат.