Арганізатар экуменічных форумаў за стварэнне хрысціянскага культурнага альянсу ў Беларусі
Перадумовы для далейшага
развіцця праваслаўна-каталіцкага дыялогу ў Беларусі ёсць, лічыць Грыгорый Даўгяла,
загадчык цэнтра міжнародных сувязяў Інстытута тэалогіі Белдзяржуніверсітэта. Акрамя
таго, што праваслаўныя і католікі – гэта дзве самыя вялікія хрысціянскія супольнасці
ў Беларусі, якія вядуць дыялог на аснове ўзаемаразумення і супрацоўніцтва, сучасная
эпоха дае яшчэ шмат новых аргументаў для развіцця гэтай працы. “Мы бачым, што свет
становіцца глабальным, сучасны чалавек акунуўся ў цэлы шэраг выклікаў, якія яго і
бянтэжаць, і прымушаюць па-іншаму паглядзець на сябе, на адносіны з грамадствам і
прадстаўнікамі іншых хрысціянскіх Цэркваў. - адзначыў Грыгорый Даўгяла ў інтэрв’ю
Ватыканскаму радыё - Тут хрысціянам, найперш католікам і праваслаўным, вельмі важна
выйсці на стварэнне хрысціянскага культурнага альянса, садружнасці. Нам нікуды не
дзецца ад гэтых хваляў глабалізацыі, таму трэба стварыць сумесныя хвалярэзы, каб структурыраваць
гэтыя працэсы і атрымаць карысць ад гэтых працэсаў для хрысціянскага дабравесця, для
захавання хрысціянскіх традыцый”.
У Беларусі, лічыць арганізатар праваслаўна-каталіцкіх
форумаў, даволі спрыяльныя ўмовы, нягледзячы на некаторыя цяжкасці, для развіцця дыялогу,
будавання гэтых адносін, правядзення сумесных мерапрыемстваў. І кіраўнікі Цэркваў
гэта разумеюць, ёсць падтрымка і з боку дзяржавы, якой, магчыма, з прагматычнага пункту
гледжання, важна, каб такі дыялог і міралюбнасць у Беларусі існавалі.
“І гэтым
трэба карыстацца. - лічыць спадар Даўгяла - Сучасны чалавек чакае сумеснага сведчання
хрысціян па многіх пытаннях. Давайце паглядзім, калі з агульных філасофскіх пазіцый,
сучасны чалавек вельмі добра абсталяваны тэхнічна, ён не ведае адказаў на тры галоўных
пытанні, якія ўсё роўна жывуць унутры і вярэдзяць душу: на што нам дадзена спадзявацца,
куды мы ідзём і што нам дадзена ведаць? Сучасны чалавек падобны да вадзіцеля дарагой
машыны з моцным рухавіком, які выкінуў навігатар. Задача і праваслаўных, і католікаў,
і іншых традыцыйных хрысціянскіх супольнасцяў – імкнуцца вярнуць у галовы людзей “навігатар”,
пастарацца абараніць тыя каштоўнасці, тыя традыцыі, якія зараз размываюцца – сямь’я,
этыка і інш. Гэта вельмі важна”.
У гэтым сэнсе шмат робіцца і намаганнямі кіраўнікоў
і Праваслаўнай Царквы, і Каталіцкага Касцёла . Напрыклад, у маі прайшла канферэнцыя,
прысвечаная пытанням біяэтыкі: дасягненням генетыкі, новых тэхналогій, якія з аднаго
боку даюць людзям надзею, а з другога – велімі часта з’яўляецца спакусай пераступіць
праз чалавечую годнасць. Хрысціян непакояць праекты, звязаныя з экперыментамі над
эмбрыёнамі, з сурагатным мацярынствам – адзначыў Грыгорый Даўгяла. “Хрысціянскі погляд
на прыроду чалавека не дазваляе пагадзіцца з такой магчымасцю і адзіная пазіцыі, якая
была выказана па выніках канферэнцыі ў рэзалюцыі, прынятай католікамі, праваслаўнымі,
лютэранамі і баптыстамі, якія таксама прымалі ўдзел у гэтай канферэнцыі, яна – адзінае
сведчанне аб поглядзе на хрысціянскія каштоўнасці і на гэтыя пытанні. У лістападзе
ў нас плануецца правядзенне чарговай канферэнцыі з серыі нашых межканфесійных, межрэлігійных
сустрэч, якія праводзяцца раз у 2 гады. Яна будзе прысвечана пытанню: “Хрысціянская
антрапалогія перад выклікам сучаснасці”. Гэта праваслаўна-каталіцкая сутрэча, якая
заўсёды адкрыта і для ўдзелу пратэстантаў, юдэяў, мусульман, якая дазваляе знайсці
даволі шырокую платформу для аналізу таго, што адбываецца. Такім чынам і будуць закранацца
пытанні адносін да прыроды чалавека, як сучасная культура глядзіць на чалавека, што
станоўчага, што небяспечнага”, - распавёў загадчык цэнтра міжнародных сувязяў Інстытута
тэалогіі.
Чакаецца, што ўдзел у канферэнцыі прымуць сапраўды эксперты з сусветнымі
імёнамі. Але такая сустрэча дазволіць паразмаўляць не толькі спецыялістам у гэтай
сферы, але і шырокаму колу зацікаўленых людзей, паведаміў Грыгорый Даўгяла. Падрымкай
інтэлектуальнай часткі стануць мастацкія сродкі – разам з канферэнцыяй пройдзе ўжо
традыцыйны адмысловы канцэрт у Белдзяржфілармоніі. Ужо сама падрыхтоўка да гэтага
форуму нагадвае дыялог, а нават сяброўства паміж вернікаімі двух канфесій, няверуючымі,
людзьмі добрай волі.
“Успамінаюцца словы Апостала Паўла: “А калі вы прывітаеце
толькі братоў, што асаблівага робіце, ці не гэта робяць і язычнікі?”. А нам, на жаль,
прыходзіцца па-новаму вучыцца вітаць і братоў. Экуменічныя сустрэчы і кантакты як
раз і дапамагаюць будаваць адносіны з нашымі братамі-хрысціянамі, і гэта дапамагае
нам выглядаць па-іншаму перад людзьмі знешнімі, перад тымі, хто толькі прымярае свой
светапогляд. І калі гэты чалавек бачыць добрыя адносіны паміж намі, яму лягчэй суадносіць
сябе з хрысціянскім светапоглядам. А калі паміж намі канфлікт, мы толькі адпужваем
людзей свецкіх і няверуючых”, - адзначыў спадар Даўгяла.
У гэтым напрамку,
што тычыцца экуменічнага дыялогу, і стараецца працаваць Інтытут тэалогіі Белдзяржуніверсітэта
і Міжнародны хрысціянска-адукацыйны цэнтр імя святых Мятода і Кірыла. Гэты працэс
не быў бы паўнавартасным, па словах Грыгорыя Даўгялы, без удзелу прадстаўнікоў Каталіцкага
Касцёлу, якія разам з праваслаўнымі працуюць у цэлым шэрагу сумесных праектаў.