«Պի.Պի.Սի.» կը հաղորդէ, որ Խրուաթիա պաշտօնապէս դարձաւ Եւրոպական Միութեան անդամ, ինչ
որ երկրի նախագահ Իւօ Եոսիփովիչ պատմական մեծ եւ ուրախալի իրադարձութիւն մը որակած է: Այս
առիթով Խրուաթիոյ մայրաքաղաք Զաղրեպի բնակիչները դուրս եկած են կեդրոնական հրապարակ եւ
հրավառութեամբ, երաժշտութեան ու Պեթհովենի «Ձօն ուրախութեան» երկով տօնած են իրադարձութիւնը: «Պի.Պի.Սի.»
կը հաղորդէ, որ Եւրոպական Միութեան անդամակցութեան վերաբերեալ բնակչութեան ոգեւորութիւնը
որոշ չափով նուազ եղած է Եւրոյի գօտիի ճգնաժամին, ինչպէս նաեւ Խրուաթիոյ տնտեսական խնդիրներուն
պատճառով: Խրուաթիա Եւրոպական Միութեան անդամակցութեան համար դիմած էր տասը տարի առաջ: Ըստ
որոշ խրուաթներու, լուրջ խնդիրներ ունեցող կառոյցին անդամակցիլը Խրուաթիոյ տնտեսութեան
բարելաւման վրայ քիչ ազդեցութիւն պիտի ունենայ: Բացի ատկէ, Եւրոպական Միութեան որոշ ղեկավարներ
լուրջ մտավախութիւն ունին` կապուած Խրուաթիոյ մէջ գոյութիւն ունեցող փտածութեան ու կազմակերպուած
յանցագործութեան հետ: Այդ իսկ պատճառով երկիրը տակաւին պիտի չմիանայ միասնական դրամանիշին
ու Շենկենեան գօտիին: