സമാധാനാഹ്വാനവുമായി
പാപ്പാ ഫ്രാന്‍സിസിന്‍റെ പ്രഥമ ഈസ്റ്റര്‍ സന്ദേശം
Urbi et Orbi Message of Easter 2013റോമാ നഗരത്തിലും ലോകമെമ്പാടുമുള്ള സഹോദരങ്ങളേ, ഉത്ഥാനമഹോത്സവ ആശംസകള്‍ !
ക്രിസ്തു ഉത്ഥാനംചെയ്തു! ഇതു പ്രഘോഷിക്കാന്‍ എനിക്ക് അതിയായ സന്തോഷമുണ്ട്.
ഈ സദ്വാര്‍ത്ത എല്ലാ ഭവനങ്ങളിലും കുടുംബങ്ങളിലും, വിശിഷ്യാ വേദനിക്കുന്നവരുടെ പക്കല്‍ ആശുപത്രികളിലും, ജയിലുകളിലും എത്തണമെന്ന് ഞാന്‍ ആഗ്രഹിക്കുന്നു.
സര്‍വ്വോപരി അത് എല്ലാ മനുഷ്യഹൃദയങ്ങളിലും എത്തട്ടെ, കാരണം ക്രിസ്തു ഉത്ഥാനംചെയ്തു,
ഇനി നിങ്ങളില്‍ ആശയ്ക്കു വകയുണ്ട്, നിങ്ങള്‍ തിന്മയുടെയും പാപത്തിന്‍റെയും അധീനതയിലല്ല. സ്നേഹം വിജയിച്ചിരിക്കുന്നു, കാരുണ്യം നേടിയിരിക്കുന്നു - എന്ന സദ്വാര്‍ത്ത മനുഷ്യഹൃദയങ്ങളില്‍ പതിയണമെന്നാണ് ദൈവം ആഗ്രഹിക്കുന്നത്. കല്ലറയിലെത്തിയപ്പോള്‍ അത് ശൂന്യമായിരിക്കുന്നതു കണ്ട ക്രിസ്തുവിന്‍റെ ശിഷ്യഗണത്തില്‍പ്പെട്ട സ്ത്രീകളെപ്പോലെ ഉത്ഥാനത്തിന്‍റെ അര്‍ത്ഥമെന്തെന്നോര്‍ത്ത് നാം എല്ലാവരും അന്ധാളിക്കുന്നുണ്ടാകാം.
ക്രിസ്തു ഉത്ഥാനംചെയ്തുവെന്നതിന്‍റെ അര്‍ത്ഥമെന്താണ്?
ദൈവസ്നേഹം തിന്മയെക്കാളും മരണത്തെക്കാളും ശക്തമാണെന്നാണ് അതിനര്‍ത്ഥം. ദൈവസ്നേഹത്തിന് നമ്മുടെ ജീവിതങ്ങളെ പരിവര്‍ത്തനംചെയ്യാമെന്നും, പാപത്താല്‍ വിജനമായ നമ്മുടെ ഹൃദയങ്ങളില്‍ സുകൃതത്തിന്‍റെ പൂക്കള്‍ വിരിയിക്കാനാകുമെന്നും അതിനര്‍ത്ഥമുണ്ട്. അതേ, സ്നേഹവുമായിട്ടാണ് മനുഷ്യപുത്രന്‍ താഴ്മയിലും, മരണത്തോളമുള്ള ത്യാഗത്തിലും, ദൈവത്തില്‍നിന്നും മനുഷ്യനെ വേര്‍പെടുത്തുന്ന തിന്മയുടെ അതിര്‍ത്തികളിലേയ്ക്കു കടന്നുവന്നത്. ആ ദൈവികസ്നേഹമാണ് ക്രിസ്തുവിന്‍റെ മൃതഗാത്രത്തെ രൂപാന്തരപ്പെടുത്തി, ഉയിര്‍പ്പിച്ച് നിത്യതിയിലേയ്ക്ക് ആനയിച്ചത്.
ഉത്ഥാനാനന്തരം ക്രിസ്തു ഭൂമിയിലേയ്ക്കു മടങ്ങിയില്ല, ദൈവമഹത്വം പുല്‍കുകയായിരുന്നു. അവിടുന്ന് നമുക്കായി പ്രത്യാശയുടെ ഭാവി തുറക്കുകയായിരുന്നു. മനുഷ്യഭാവത്തിലാണ് അവിടുന്ന് സ്വര്‍ഗ്ഗീയ മഹത്വം പൂകിയത്. അങ്ങനെ ഈസ്റ്റര്‍ പുറപ്പാടാണ്. തിന്മയുടെയും പാപത്തിന്‍റെയും അടിമത്വത്തില്‍നിന്നും സ്നേഹത്തിലേയ്ക്കും നന്മയിലേയ്ക്കുമുള്ള കടന്നുപോക്കാണത്.
കാരണം ദൈവം ജീവനാണ്, അവിടുന്ന് സമ്പൂര്‍ണ്ണ ജീവനാണ്. ദൈവിക ജീവന്‍ മനുഷ്യരില്‍ അധിവസിക്കുന്നു.
പ്രിയ സഹോദരരേ, ക്രിസ്തു മരിച്ച്, എന്നേയ്ക്കുമായി ഉത്ഥാനംചെയ്തു. തിന്മയുടെ അടിമത്വത്തില്‍നിന്നും നമ്മെ നന്മയുടെ സ്വാതന്ത്ര്യത്തിലേയ്ക്കു നയിക്കുന്ന ഈ ഉത്ഥാനപ്രഭയും കടന്നുപോക്കും എല്ലായുഗങ്ങളിലും എക്കാലവും അനുദിന ജീവിത യാഥാര്‍ത്ഥ്യങ്ങളുടെ മേഖലകളിലും യാഥാര്‍ത്ഥ്യമാകേണ്ടതാണ്.
എത്രയോ മരുഭൂമികളാണ് മനുഷ്യര്‍ക്ക് മറികടക്കാനുള്ളത്? സര്‍വ്വോപരി, ഹൃദയാന്തരാളത്തില്‍ ദൈവസ്നേഹമില്ലായ്മയുടെയും സഹോദരസ്നേഹമില്ലായ്മയുടെയും മരുഭൂമി വ്യാപിക്കുമ്പോള്‍,
നാമാണ് ദൈവം ഭരമേല്പിച്ച സൃഷ്ടിയുടെയും, അവിടുന്ന് ഭാവിയില്‍ ലോകത്ത് വര്‍ഷിക്കുന്നതുമായ നന്മകളുടെയും സംരക്ഷകര്‍ എന്നു മനസ്സിലാക്കാന്‍ സാധിക്കാതെ പോകുന്നു. മരുപ്രദേശത്ത് മരുപ്പച്ച വിരിയിക്കാനും, ഉണങ്ങിയ അസ്ഥിക്ക് ജീവന്‍ നല്കാനും ദൈവിക കാരുണ്യത്തിനു കഴിയും (എസക്കിയ 37, 1-14). ആകയാല്‍ പുനരുത്ഥാനത്തിന്‍റെ കൃപാസ്പര്‍ശം ഏവരും സ്വീകരിക്കണം എന്ന ക്ഷണമാണ് ഞാന്‍ മുന്നോട്ടു വയ്ക്കുന്നത്.
ദൈവിക കാരുണ്യത്താല്‍ നമുക്ക് നവീകൃതരാകാം, ക്രിസ്തുവിനാല്‍ നാം സ്നേഹിക്കപ്പെടട്ടെ! അവിടുത്തെ സ്നേഹത്തിന്‍റെ ശക്തി നമ്മുടെ ജീവിതങ്ങളെ രൂപാന്തരപ്പെടുത്തുകയും, ദൈവം ഭൂമിയെ നനച്ച്, സൃഷ്ടിയെ സംരക്ഷിക്കാന്‍ പോരുന്ന വിധത്തില്‍ സമാധാനവും നീതിയും ഇവിടെ സമൃദ്ധമാകട്ടെ.
ആകയാല്‍ വിദ്വേഷത്തെ സ്നേഹമായും, പകയെ ക്ഷമയായും, യുദ്ധത്തെ സമാധാനമായും മാറ്റേണമേ എന്ന് മരണത്തെ ജീവനാക്കി മാറ്റുന്ന ഉത്ഥിതനായ ക്രിസ്തുവിനോട് യാചിക്കാം.
അതേ, ക്രിസ്തുവാണ് നമ്മുടെ സമാധാനം, അവിടുന്നിലൂടെ സകലത്തിന്‍റെയും സമാധാനത്തിനായി പ്രാര്‍ത്ഥിക്കുന്നു : മദ്ധ്യപൂര്‍വ്വദേശത്ത് സമാധാനം വളരുന്നതിന്, പ്രത്യേകിച്ച് ഇസ്രായേല്‍ പലസ്തീന്‍ രാജ്യങ്ങള്‍ തമ്മില്‍ സമവായത്തിന്‍റെ പാത കണ്ടെത്താന്‍ വിഷമിക്കുന്ന ഈ ഘട്ടത്തില്‍, സൗഹൃദത്തോടും ധൈര്യത്തോടുംകൂടെ അനുരജ്ഞന മാര്‍ഗ്ഗങ്ങള്‍ തുറക്കുന്നതിനും, സുദീര്‍ഘമായ സംഘട്ടനം അവസാനിപ്പിക്കുന്നതിനും ഇടയാക്കണമേ, എന്ന് പ്രാര്‍ത്ഥിക്കാം.
ഇറാക്കില്‍ സമാധാനം വളരട്ടെ. അധിക്രമങ്ങള്‍ക്ക് അറുതിവരട്ടെ. കലാപത്താല്‍ ചിഹ്നഭിന്നമായ സിറയയും പ്രശാന്തമാവട്ടെ. സമാശ്വാസം തേടുന്ന അഭയാര്‍ത്ഥികള്‍ക്ക് അര്‍ഹിക്കുന്ന സഹായം ലഭിക്കാന്‍ ഇടയാക്കണമേ. എത്രത്തോളമാണ് ഈ രക്തച്ചൊരിച്ചില്‍! ഒരു രാഷ്ട്രീയ പരിഹാരമാര്‍ഗ്ഗം കണ്ടെത്തും മുന്‍പേ ഇനിയും എത്രത്തോളം യാതനകള്‍ക്കും പ്രശ്നങ്ങള്‍ക്കുമാണ് പരിഹാരം കാണാന്‍ വൈകിയിരിക്കുന്നത്?
ഇനിയും അധിക്രമങ്ങളുടെ വേദിയായിരിക്കുന്ന ആഫ്രിക്കയ്ക്കും സമാധാനം ആശംസിക്കുന്നു.
മാലിയില്‍ ഐക്യവും സുസ്ഥിതിയും പുനഃസ്ഥാപിക്കപ്പെടട്ടെ; നൈജീരിയയില്‍ ആക്രമണങ്ങള്‍ തുടരുകയും നിര്‍ദ്ദോഷികളായ ജനങ്ങള്‍ ഭീഷണിയിലും, കുട്ടികള്‍ ഉള്‍പ്പെടെ നിരവധിപേര്‍ ഭീകരരുടെ ബന്ധനത്തില്‍ ഇപ്പോഴും കഴിയുകയാണ്. അവരെ സമാശ്വസിപ്പിക്കണമേ. ആഫ്രിക്കന്‍ കോംഗോയ്ക്കുവേണ്ടിയും മദ്ധ്യാഫ്രിക്കന്‍ റിപ്പബ്ലിക്കന്‍ രാജ്യങ്ങള്‍ക്കുവേണ്ടിയും നമുക്കു പ്രാര്‍ത്ഥിക്കാം. ഏഷ്യയില്‍, വിശിഷ്യാ കൊറിയന്‍ ഉപദ്വീപില്‍ സമാധാനം വളരട്ടെയെന്ന് പ്രത്യേകം പ്രാര്‍ത്ഥിക്കാം. വിയോജിപ്പുകള്‍ മറികടന്ന് അവിടെ അനുരജ്ഞനത്തിന്‍റെ നവചൈതന്യം വളരട്ടെ.
ആര്‍ത്തികൊണ്ടും ലാഭേച്ഛകൊണ്ടും ലോകം അധിക്രമങ്ങളാല്‍ വിഭജിതമാണ്. സ്വാര്‍ത്ഥതയാല്‍ മുറിപ്പെട്ട് മനുഷ്യജീവിതങ്ങള്‍ക്കും കുടുംബങ്ങള്‍ക്കും അത് ഭീഷണിയായിരിക്കുകയാണ്. അടിമത്വത്തിന്‍റെ വളരെ വ്യാപകരൂപവുമായ മനുഷ്യക്കച്ചവടത്തിനുപോലും ഇന്ന് സ്വാര്‍ത്ഥതയില്‍ മുതിരുന്ന ലോകത്തിനുവേണ്ടി പ്രത്യേകം പ്രാര്‍ത്ഥിക്കാം. മയക്കുമരുന്നു കച്ചവടവും പ്രകൃതി വിഭവങ്ങളുടെ നിരന്തരമായ ചൂഷണവുമായി ബന്ധപ്പെട്ട് അധിക്രമങ്ങളാല്‍ കീറിമുറിക്കപ്പെട്ട ഭൂമിയില്‍ സമാധാനം പുലരട്ടെ. പ്രകൃതിക്ഷോഭങ്ങള്‍ക്കും കാലാവസ്ഥാ കെടുതികള്‍ക്കും വിധേയരായവരെ ഉത്ഥിതനായ കര്‍ത്താവ് സമാശ്വസിപ്പിച്ച് നമ്മെ പ്രകൃതിയുടെ ഉത്തരവാദിത്വമുള്ള പരിപാലകരാക്കട്ടെ.
റോമിന്‍റെയും ലോകത്തിന്‍റെയും വിവിധ ഭാഗങ്ങളില്‍നിന്നും എന്നെ ശ്രവിക്കുന്ന പ്രിയ സഹോദരങ്ങളേ, ഞാന്‍ സങ്കീര്‍ത്തകന്‍റെ വാക്കുകളില്‍ നിങ്ങളെ അഭിസംബോധന ചെയ്യട്ടെ. “കര്‍ത്താവിന് നന്ദി പ്രകാശിപ്പിക്കുവിന്‍ എന്തെന്നാല്‍ അവിടുന്ന് നല്ലവനാണ്. അവിടുത്തെ അചഞ്ചല സ്നേഹം ശാശ്വതമാണ്. ഇസ്രായേല്‍ പറയട്ടെ, അവിടുത്തെ സ്നേഹം ശാശ്വതമാണ്” (സങ്കീര്‍ത്തനം 117, 1-2).
ലോകത്തിന്‍റെ നാനാഭാഗങ്ങളില്‍നിന്നും ക്രൈസ്തവീകതയുടെ ഹൃദയമായ ഈ ചത്വരത്തില്‍ എത്തുകയും
മാധ്യമങ്ങളിലൂടെ ഈസ്റ്റര്‍ പരിപാടികളില്‍ പങ്കെടുക്കുകയും ചെയ്യുന്ന ഏവര്‍ക്കും എന്‍റെ ആശംസകള്‍!
നവമായ ചൈതന്യത്തോടെ എല്ലാവര്‍ഷവും ഈ സുദിനത്തില്‍ സന്തോഷത്തിന്‍റേയും പ്രത്യാശയുടേയും സമാധാനത്തിന്‍റേയും സന്ദേശം നിങ്ങളുടെ കുടുംബങ്ങളിലും നാടുകളിലും എത്തിക്കുക.
മരണത്തേയും പാപത്തേയും കീഴടക്കിയ ഉത്ഥിതനായ ക്രിസ്തു നമുക്കെല്ലാവര്‍ക്കും, വിശിഷ്യാ പാവങ്ങള്‍ക്കും പരിത്യക്തര്‍ക്കും തുണയാവട്ടെ. നിങ്ങളുടെ സാന്നിദ്ധ്യത്തിനും വിശ്വാസ സാക്ഷൃത്തിനും നന്ദി! ഉത്ഥിതനായ ക്രിസ്തു ലോകം മുഴുവനെയും നീതിയുടെയും സ്നേഹത്തിന്‍റെയും സമാധാനത്തിന്‍റെയും പാതിയല്‍ നയിക്കട്ടെ എന്ന് ഒരിക്കല്‍ക്കൂടി ഞാന്‍ ആശംസിക്കുന്നു!
+ പാപ്പാ ഫ്രാന്‍സിസ്
Original text : translated by fr. william nellikal
| All the contents on this site are copyrighted ©. |