Касцёл просіць ЕС не ўзбройваць сірыйскіх паўстанцаў
Як паведаміў у спецыяльнай
заяве 28 чэрвеня фонд “Дапамога Касцёлу ў патрэбе”(ДКП), ліванская і сірыйская каталіцкія
супольнасці накіравалі ў Брусэль сваіх прадстаўнікоў, каб там расказаць непасрэдна
аб трагізме сітуацыі ў гэтых блізкаўсходніх краінах. “Уводзіць сюды новыя ўзбраенні
– значыць павялічыць колькасць сірот і ўдоў”, - цытуе фонд ДКП словы мяльхіцкага Патрыярха
Дамаска Грыгорыя ІІІ Лахама. Іх ён прамовіў да старшынІ Еўрапейскага Савета Германа
ван Ромпэя 26 чэрвеня. У дэлегацыі тамсама ліванскі арцыбіскуп Джон Дарвіш і езуіт
Зіяд Хілал – адзін з нямногіх святароў, што засталіся ў сірыйскім Хомсе. На працягу
трох дзён дэлегацыя правяла сустрэчы таксама з кабінетам супрацоўнікаў старшыні Еўракамісіі
Хазэ Мануэля Барозы. Яна таксама падзялілася сваімі сведчаннямі і думкамі з двумастамі
еўрапарламентарыямі. “Толькі палітычныя перамовы, якія прымуць пад неабходную ўвагу
шчыры ўклад пасрэдніцтва хрысціян, можа прывесці да міра ў краіне і пераканаць сірыйцаў
заставацца ў ёй”,- падкрэсліў Патрыярх. Многія сірыйцы ўцяклі ў Ліван, і дэлегацыя
засведчыла перад Еўрапарламентам жудасныя ўмовы, у якіх знаходзяцца бежанцы. Толькі
ў даліне Бекаа на сродкі Касцёла ўтрымліваюцца паўтары тысячы шматдзетных сем'яў.
Як паведаміў арцыбіскуп Джон Дарвіш, большая колькасць уцекачоў аддае перавагу дапамозе
з боку хрысціянскіх структур, чым гуманітарным высілкам ААН , дзеля боязі, што праводзімая
там рэгістрацыя імёнаў “можа прывесці да помсты пасля заканчэння вайны”. “Mногія мусульмане
таксама стукаюцца ў нашы дзверы”, - адзначыў арцыбіскуп Захле і Ферцола. “Спадзявацца,
што пераўзбранне апазіцыі прывядзе да раўнавагі – ілюзія”, - заявілі ў Брусэлі прадстаўнікі
Касцёла ў Сірыі і Ліване, падкрэсліўшы, што гэта толькі прывядзе да эскалацыі насілля.
“Мы ўжо завалены зброяй...Нават дзеці носяць аўтаматы”, - засведчыў кс.Зіяд Хілал
з Хомса. Фонд “Дапамога Касцёлу ў патрэбе” у сваёй заяве паведамляе, што накіраваў
у структуры “Сaritas” ў Ліван для дапамогі сірыйцам больш за 1 млн. еўра, але гэта
“кропля ў моры” патрэб. Паведамляецца, што палітыкі Еўрасаюза запэўнілі аб тым, што
будуць працягваць намаганні па пошуку дыпламатычнага вырашэння крызісу і пакінуць
адкрытым камунікацыйны канал для хрысціян, якія засталіся ў Сірыі.