Liturgjia e Fjalës së Zotit e festës së Shën Pjetrit e Palit Apostuj
Ja përsëri në takimin me Fjalën e Zotit, kësaj radhe do të dëgjojmë e meditojmë së
bashku leximet biblike të liturgjisë së Fjalës Hyjnore të festës së Shën Pjetrit e
Palit Apostuj. Kremtojmë pra solemnitetin e apostujve Pjetër e Pal, simbole, përkatësisht,
të themelit e të misionit universal të Kishës së Jezu Krishtit. Pjetri e Pali qenë
të bashkuar në mision e në martirizim. Pjetri ai që e njohu e pranoj madhërinë e
doktrinës së Palit; Pali ai që e vërtetoi mësimin dhe predikimin e tij me Pjetrin,
për të mos rrezikuar të predikonte gjërat e veta, në vend që t'i predikonte ato të
Jezu Krishtit. Pjetri e Pali janë sintezë e mrekullueshme e bashkimit në dallueshmëri
të dhuratave e të karizmave që Zoti u ka falë. Këta janë Apostujt e shenjtë që me
gjakun e tyre e kanë bërë të frytshme Kishën. Atyre u drejtohemi me lutje që të ndërmjetësojnë
pranë Hyjit Dashuri për përforcimin e fesë sonë në Krishtin e Gjallë. Me siguri
që çdo njëri prej të dy shenjtorëve, do të meritonte një festë në veti; aq e madhe
është pesha e rëndësia e shenjtërimit dhe domethënia që kanë pasur e vazhdojnë të
kenë për Kishën. Megjithë dallueshmërinë që kanë njëri me tjetrin, ata kanë diçka
që i bashkon dhe që këshillon t'i kremtojmë së bashku. Ajo që i bashkon më duket
se është mirë e shprehur në antifonen e hyrjes së meshës së këtij solemniteti: "Janë
këta apostuj të shenjtë që gjatë jetës tokësore e kanë bërë të frytshme Kishën me
gjakun e tyre, kanë pi kelkun e Zotërisë Jezus, e janë bërë miq të Zotit". Titulli
i tyre i lavdisë është pra fakti që kanë dëshmuar Krishtin deri më vdekje, duke e
bërë të "frytshme" zhvillimin dhe rritjen e Kishës së parë, më shumë se të gjithë
të tjerët. Pastaj, të mos harrojmë faktin, historikisht të dokumentuar, që të dy kanë
pësuar martirizimin për Krishtin në Romë, qytetin e "amshuar". Dy Apostujt e mëdhenj
Pjetri e Pali, shtylla e themele të Kishës, në ditën e festë së tyre, na ndihmojnë
të thellojmë karizmat e tyre të veçanta, dhuratat e tyre që karakterizonin secilin
dhe t'i jemi mirënjohës Zotit për transmetimin po nga ata, të Ungjillit e të doktrinës
Kishtare në të gjitha kohërat, e kështu na garantohet në kohë e vërteta e Dëftimit
të Zotit e vepra e shëlbimit realizuar për ne nga Krishti Zot. Libri e shpata janë
simbolet ikonografike me të cilat paraqiten Pjetri, "peshkatar i përvujtë i Galilesë",
e Pali "apostull-doktor i popujve", urtia e dëftuar e Atit dhe forca e dëshmisë ungjillore,
nga njëra anë Jezusi dhe e vërteta e tij, nga ana tjetër gjyqi i shpëtimit që vjen
e realizohet në jetën e secilit prej nesh. Konfrontimi mes dy apostujve të shenjtë
mund të vazhdojë: herë herë duken aq larg njëri tjetrit e të pakrahasueshëm, nga ana
tjetër përplotësohen në historitë e thirrjes së tyre, në dëshminë e jetës së tyre
për fenë Krishtin, që vuloset me gjakun e martirizimit të tyre. Jeta e dëshmia e tyre
për Krishtin, janë një thirrje për ne të kthehemi në udhën e Zotit, të pranojnë planin
e Hyjit, pavarësisht se cila është “historia” jonë aktuale më Të dhe të jetojmë në
përkim me Ungjillin e Krishtit e ta dëshmojmë më jetë dashurinë shëlbimpruese.
Liturgjia
e Fjalës së Zotit VP 12, 1-11 Pjetri përgatitet të kremtojë
Pashkët hebraike, kur ndodh arrestimi i tij. Ai kremton një pashkë të ndryshme nga
ajo që priste, por të njëjtë me atë të Mësuesit. E kremton, jo për të përkujtuar
ikjen prej Egjiptit, por arratisjen e tij personale prej Jeruzalemit. Pashka e tij
është çlirimi përfundimtar nga judaizmi dhe nga varësia e tij, është refuzimi i legalizmit
hebraik, për tu bërë të njohur shpëtimin edhe paganëve. Lexim prej Veprave
të Apostujve Në ato ditë Herodi mbret filloi të salvojë disa anëtarë të
Kishës. Me shpatë e preu Jakobin, të vëllanë e Gjonit. E kur hetoi se kjo gjë po u
pëlqente judenjve, mendoi të burgosë edhe Pjetrin. Ishin ditët e bukëve të pabrume.
E pasi e kapi, e qiti në burg dhe ua dha ta ruajnë katër skuadra, secila e përbërë
nga katër ushtarë, me qëllim që mbas Pashkëve ta qesë para popullit. Kështu pra, Pjetri
ruhej në burg, por urata e përzemërt e Kishës ngritej vazhdimisht para Hyjit për të.
Atë natë, para se Herodi mendonte ta qesë para popullit, Pjetri flinte në mes dy ushtarëve,
i lidhur në dy palë hekura, e para derës rojtarët ruanin burgun. Dhe ja, engjëlli
i Zotit u duk dhe një dritë e ndriçoi dhomën. Engjëlli i ra Pjetrit në ijë, e zgjoi
dhe i tha: “Çohu shpejt!” Prej duarve i ranë hekurat. Engjëlli i tha: “Ngjeshu dhe
lidhi sandalet!” Ai bëri ashtu. Përsëri i tha engjëlli: “Veshu petkun tënd dhe eja
pas meje!” Pjetri doli dhe po i shkonte pas. Nuk ishte i vetëdijshëm se çka po ngjante
me anë të engjëllit ishte e vërtetë, por ai kujtonte se kishte një vegim. Kaluan rojën
e parë dhe të dytën, edhe arritën te dera e hekurt që shpie në qytet. Kjo u hap vetvetiu.
Ata dolën, kaluan një rrugë e atëherë papritmas engjëlli u nda prej tij. Atëherë Pjetri
erdhi në vetë e tha: “Tani me të vërtetë po e di se Zoti e paska dërguar engjëllin
e vet për të më shpëtuar nga dora e Herodit dhe prej gjithçka priste populli i judenjve.” Fjala
e Zotit. Falenderojmë Hyjin!
Psalmi 33/34 Qoftë bekuar
Zoti që i liron miqtë e vet Përherë do ta bekoj Zotin, në gojën time
përherë është lavdi i tij. Shpirti im mburret në Zotin:le të dëgjojnë të përvujtët
e le të gëzohen. Bashkë me mua jepni lavdi Zotit, le ta lartësojmë së bashku
Emrin e tij. E kërkova Zotin e ai më dëgjoi,edhe më çliroi nga çdo frikë që pata. Shikojeni
atë e do të ndriçoheni, fytyra juaj nuk do të turpërohet. Ja, skamnori e thirri në
ndihmë e Zoti e dëgjoi dhe e shpëtoi nga të gjitha vuajtjet e tija.
Engjëlli
i Zotit ngreh llogore rreth atyre që e kanë frikë dhe i shpëton. Sprovoni e
shihni sa i mirë është Zoti! I lumi ai që shpreson në të!
Tm 4,6-8.
17-18 Pali ndjen afër vdekjen e tij, i braktisur prej të gjithëve, nuk
ka humbur asgjë nga besimi i tij. Dëshiron të vdesë ashtu si ka jetuar; agonia e
tij është një luftë, si ajo e Jezusit. Por në kopshtin e Ullinjve i gjithë ankthi
i njerëzve u hyjnizua. Vdekja është ora e së vërtetës: jo sepse njerëzit tregojnë
se çfarë janë me të vërtetë, por sepse vdekja mund të zbulojë thellësinë e besimit
të tyre. Lexim prej Letrës së dytë të shën Palit apostull drejtuar
Timoteut Fort i dashur, sa për mua, gjaku im tashmë po derdhet në nder
të Hyjit, dhe koha të nisem për atë jetë arriti! Luftën e mirë e luftova, vrapimin
e kreva, fenë e ruajta. Qysh tash më pret gati kurora e drejtësisë, që atë ditë do
të ma japë Zoti, gjykatësi idrejtë; dhe jo vetëm mua, por të gjithë atyre që do ta
presin me dashuri ardhjen e tij. Por Zoti qe me mua. Ai më dha fuqi që predikimi
i Ungjillit të kumtohej plotësisht dhe ta dëgjonin të gjithë paganët. Hyji më shpëtoi
nga goja e luanëve. Vetë Zoti do të më shpëtojë nga çdo vepër e keqe dhe do të më
shëlbojë për Mbretërinë e vet qiellore. Lavdi Atij në shekuj të shekujve! Amen! Fjala
e Zotit. Falënderojmë Hyjin! Mt 16, 18 Aleluja! Aleluja! Ti
je Pjetër – Shkëmb; dhe mbi këtë shkëmb unë do ta ndërtoj Kishën time, dhe dyert e
ferrit s’do të ngadhënjejnë kundër saj! Aleluja! Aleluja! Ungjilli Mt
16, 13-19 Simoni i jep Jezusit titullin e Mesisë, dhe Jezusi i cakton titullin
mesianik “Gur”. Arsyeja kryesore, për të cilën është quajtur gur ose shkëmb mbi të
cilin është ndërtuar Kisha, është besimi që ka dëshmuar hapur. Ka qenë zëri përcjellës
i besimit të apostujve, që është në bazë të ekzistencës së tyre dhe e bashkimit të
tyre. Pjetri ka si detyrë edhe të konfirmojë besimin dhe të garantojë bashkimin mes
besimtarëve në dashuri dhe bamirësi. Leximi i Ungjillit shenjt sipas
Mateut Kur Jezusi arriti në krahinën e Cezaresë së Filipit, i pyeti nxënësit
e vet: “Ç’thonë njerëzit, kush është Biri i njeriut?” Ata u përgjigjën: “Disa thonë
se është Gjon Pagëzuesi; do të tjerë Elia; do të tjerë Jeremia ose një ndër profetë.”
“Po ju – u tha atyre – ç’thoni: kush jam unë?” Iu përgjigj Simon Pjetri: “Ti je Mesia,
Biri i Hyjit të gjallë!” Atëherë Jezusi i tha: “I lumi ti, o Simon, biri i Jonës,
sepse këtë nuk ta zbuloi mishi e gjaku, por Ati im që është në qiell! Edhe unë po
të them: Ti je Pjetër – Shkëmb, dhe mbi këtë shkëmb unë do ta ndërtoj Kishën time,
dhe dyert e ferrit s’do të ngadhënjejnë kundër saj! Ty do t’i jap çelësat e Mbretërisë
së qiellit: gjithçka të lidhësh mbi tokë, do të jetë e lidhur edhe në qiell, e gjithçka
të zgjidhësh mbi tokë, do të jetë e zgjidhur edhe në qiell.” Fjala e Zotit.
Lavdi të qoftë ty, o Krisht!