Մուրսի Առաջարկած Է Փոխել Եգիպտոսի Սահմանադրութիւնը

«Ռոյթըրզ» կը հաղորդէ, որ Եգիպտոսի նախագահ Մոհամետ Մուրսի ընդդիմութեան առաջարկած է մասնակից դառնալ երկրին սահմանադրութեան մէջ փոփոխութիւններ կատարելու շուրջ խորհրդակցութեան:
Աւելի քան երկուքուկէս ժամ տեւած պատկերասփռուած իր ուղերձին մէջ Մուրսի յայտարարած է, որ կը սպասէ բոլոր կուսակցութիւններու ղեկավարներուն` սահմանադրական խորհրդակցութեան նախագահը ընտրելու նպատակով: Եգիպտոսի նախագահը նաեւ պատմած է, որ «ազգային հաշտութեան» նպատակով ան մտադիր է ստեղծել կոմիտէ մը, որուն կազմին մէջ պիտի ըլլան ազդեցիկ հանրային գործիչներ, ներառեալ` իսլամ եւ քրիստոնեայ հոգեւորականներ:
«Ես ընդդիմութեան կ՛ըսեմ` դէպի փոփոխութիւններ տանող ճամբան ազատ է», ընդգծած է Մուրսի, որուն նախագահութեան մէկ տարին ամբողջացաւ:
Անդրադառնալով իր կողմնակիցներուն եւ հակառակորդներուն, այսօր ու վաղը նախատեսուած ցոյցերուն` Մուրսի կոչ ուղղեց զերծ մնալու բռնութենէն: «Ցոյցերը միջոց են տեսակէտ յայտնելու եւ ոչ թէ զանոնք պարտադրելու», ըսած է Եգիպտոսի նախագահը: