Dom Mirget Gegaj: Si meshtarë në mesin e popullit të Zotit
Kisha dioqezane e Tiranë-Durrësit në festë, përshugurimin meshtarak të
diakonit shqiptar dom Mirget Gegaj. Meshën solemne të shugurimit meshtarak, në festën
e Shën Pjetrit e Palit Apostuj, në Katedrale të Shën Palit në Tiranë, nesër në ora
11.00 do ta kryesojë kryeipeshkvi i vendit, imzot Rrok Mirdita. Mbi gëzimin e domethëniet
e shugurimit meshtarak, në mikrofonin e RV të dëgjojmë dëshminë e diakonit dom
Mirgetit, me prejardhje nga Berisha e Pukës e banues në Mamurras të zonës së
Kurbit......... Si meshtarë
në mesin e popullit të Zotit. Misioni i meshtarëve është ta dëshmojnë dashurinë e
Krishtit, pa iu nënshtruar modave të çastit. Prandaj janë ata shenjë e pranisë së
Zotit në botë. Meshtarët kanë si mision të punojnë për ta bërë të pranishëm Zotin
e Sakramentet e tij në realitetin e përditshëm të njerëzve. Meshtarët nuk duhet
ta reduktojnë shërbimin e tyre thjesht në profesion, por ta jetojnë me gëzim dashurinë
për Zotin, në një shoqëri gjithnjë e më të ndërlikuar. Prandaj është e rëndësishme
që besimtarët ta shohin se prifti nuk bën thjesht një detyrë, me orë pune e pastaj
është i lirë për të jetuar për vete, por se është një person i pasionuar pas Krishtit,
që bart zjarrin e dashurisë së Krishtit për njerëzit. Kështu nëse shohin se prifti
është plot me gëzimin e Hyjit, e kuptojnë se nuk mund të bëjë gjithçka, i pranojnë
kufizimet e tij dhe e ndihmojnë. Meshtaria është një “po” e përhershme, është akt
besnikërie e dashurie, njëlloj si martesa ndërmjet burrit e gruas, është themel i
vërtetë i kulturës së krishterë. Kremtimi i përditshëm i Eukaristisë i ndihmon
meshtarët të shmangin rrezikun e klerikalizmit e të mbylljes në vetvete, e në këtë
aspekt shembulli i jashtëzakonshëm i së Lumes Nënë Terezë, vepra e jashtëzakonshme
e së cilës nuk do të ishte e mundur pa praninë e Tabernakullit e të dashurisë së Zotit,
është mësim i madh. Të mendojmë për Nënë Terezën, vërtet shembull madhështor për këtë
shekull, për këto kohë, shembull dashurie që e harron vetveten, që lë mënjanë çdo
lloj klerikalizmi, që përzihet me njerëzit e me botën, shkon tek më të braktisurit,
tek më të varfrit, tek personat në prag të vdekjes dhe dhurohet krejtësisht për të
varfrit e të braktisurit. Por kjo Nënë Terezë, që na ka dhënë këtë shembull, këtë
bashkësi që ndjek gjurmët e saj, vendoste gjithnjë Tabernakullin si kusht i parë për
themelimin e Kongregatës. Pa praninë e dashurisë së Zotit, që u jepet të tjerëve,
nuk do të ishte i mundur realizimi i atij apostullimi, nuk do të ishte e mundur të
jetonte lëshimin e vetvetes në dorën e Zotit. Vetëm duke e lënë veten në dorën e Zotit,
në këtë aventurë të Hyjit, në këtë përvujtëri të Atit të Gjithëpushtetshëm, motrat
e së Lumes Nënë Terezë mundën e mund të kryejnë edhe sot këtë akt të madh dashurie,
këtë shërbim për të gjithë. Ajo le të jetë shembull për këta meshtarë të ri. Lypet
të jetojmë stinën e rilindjes e të përtëritjes shpirtërore, duke ndjekur me guxim
udhën e kthimit tonë të përhershëm tek Zoti, udhën e pastrimit e të pajtimit. Lypet
të gjejmë rrugë të reja për t’u transmetuar të rinjve bukurinë dhe pasurinë e miqësisë
me Jezu Krishtin në bashkim me Kishën e tij, siç na ftoi të bëjmë Benedikti XVI e
Papa aktual Françesku.