Святы Айцец пацвердзіў мандат папскага дэлегата для Легіянераў Хрыста
Францішак пацвердзіў
мандат кардынала Веласіа Дэ Паоліса як папскага дэлегата для Легіянераў Хрыста. Іерарх
быў прызначаны ім у 2010 г. Бэнэдыктам XVI на тэрмін да надзвычайнай генеральнай капітулы
манаскай кангрэгацыі, запланаванай на пачатак 2014 г. У сваім лісце да кардынала Святы
Айцец узгадвае іх сустрэчу 27 мая 2013 г., на якой папскі дэлегат распавёў Пантыфіку
аб стане рэарганізацыі адной з самых буйных кангрэгацый у Касцёле. У сваім лісце Францішак
паведаміў, што “уважліва азнаёміўся” з дакументамі, якія датычаць гэтай “далікатнай”
справы, у тым ліку з матэрыяламі Апостальскай візітацыі, што праходзіла ў 2009-2010
гадах. Пацвярджаючы мандат кардынала Дэ Паоліса, Святы Айцец нагадаў, што ён будзе
дзейнічаць, як і было вызначана раней, да 2014 г., калі пройдзе генеральная капітула
Легіянераў Хрыста. Сваёй асноўнай задачай яна будзе мець абранне новага кіраўніцтва
і зацвярджэнне новай канстытуцыі манаскай супольнасці, якая затым будзе даслана Папе
для належнага вывучэння. “Гэтыя крокі, - напісаў у сваім лісце Францішак - неабходныя
для шляху сапраўднага і глыбокага абнаўлення кангрэгацыі Легіянераў Хрыста і, ускосна,
для дзейнасці ўсяго руху “Regnum Christi”, свецкага крыла супольнасці.
Францішак
папрасіў кардынала трымаць яго ў курсе працэсу падрыхтоўкі купітулы і дадаў, што моліцца
аб дапамогай Святога Духа для плённага правядзення асамблеі. Пантыфік падзякаваў іерарху
за яго намаганні і папрасіў пераказаць усім членам кангрэгацыі Легіянераў Хрыста словы
заахвоты і абяцанне малітвы.
Кангрэгацыя Легіянераў Хрыста была заснавана ў
Мексіцы ў 1941 г. Яна хутка развівалася і ў дастаткова кароткі час стала адной з самых
буйных у Касцёле. У 1997 г. яе заснавальнік, кс. Марсіаль Масэль, быў публічна абвінавачаны
ў злоўжываннях адносна маладых семінарыстаў. У 2006 г. Апостальская Сталіца забараніла
яму выконваць святарскія абавязкі і наказала весці адасобленае жыццё ў малітве і пакаянні.
Улічваючы ўзрост і слабое здароўе Масэля, Кангрэгацыя Веравучэння адмовілася ад касцёльнага
судовага працэсу над ім. У маі 2010 г., пасля вывучэння сітуацыі, Апостальская Сталіца
сцвердзіла, што Масэль адзначаўся “аб’ектыўна амаральнымі паводзінамі”. Пасля чаго
кангрэгацыя Легіянераў Хрыста дыстанцыравалася ад свайго заснавальніка.