«Սուրիոյ Տագնապին Քաղաքական Լուծում Պէտք Է Ապահովել» Շեշտեց Փիսթելլի
Իտալիոյ արտաքին գործոց փոխնախարար Լափօ Փիսթելլի երէկ աւարտելէ ետք Լիբանան կատարած
իր պաշտօնական այցելութիւնը մեկնեցաւ Լիբանանէն: Պէյրութի միջազգային օդակայանին մէջ
տրուած մամլոյ ասուլիսի մը ընթացքին Փիսթելլի կոչ ուղղեց բոլորին մասնակցելու «Ժընեւ
2» խորհրդաժողովին` աւելցնելով, որ Իտալիոյ կարծիքով այս խորհրդաժողովը առաջնահերթութիւն
է: Պատասխանելով այն հարցումին, թէ եւրոպական երկիրները կը փափաքի՞ն Հըզպալլան ահաբեկչական
կազմակերպութիւններու ցանկին վրայ աւելցնել, Փիսթելլի յայտնեց, որ Պուլկարիա, Կիպրոս
եւ այլ երկիրներ այդ պահանջը յետս կոչած են` ընդգծելով, որ այս մասին քննարկումները պէտք
է կատարուին հիմնուելով օրինական տուեալներու վրայ: Փիսթելլի անհրաժեշտ նկատեց Սուրիոյ
տագնապին քաղաքական լուծման ապահովումը: Փիսթելլի նաեւ շեշտեց, որ հարաւային Լիբանանի
մէջ տեղակայուած ՖԻՆԻՒԼ-ի միջազգային խաղաղապահ ուժերուն զօրակցող իտալական ուժերը պիտի
շարունակեն իրենց առաքելութիւնը եւ պիտի օժանդակեն Լիբանանին: Ան մամլոյ ասուլիսը
եզրափակեց ըսելով, որ ինք լաւատես է Լիբանանի ապագային նկատմամբ: