Հաւաք Երանելի Մալոյեանի Տօնակատարութեան Առթիւ
Շաբաթ 22 Յունիս 2013-ին, առաւօտեան ժամը 11:30-ին, Սիրտ Յիսուսի նուիրուած ամսուայ և
Երան. Մալոյեանի յիշատակի օրուան առթիւ, Զմմառու Պատրիարքական Միաբանութեան Վարչութիւնը,
հանդիպում մը կազմակերպեց վանքիս մէջ, նախագահութեամբ Ամեն. և Գերերջ. Հոգեւոր Տիրոջ,
մասնակցութեամբ Գերպծ. Պաթագեանի, Պատրիարքական Փոխանորդի և Վարչական հայրերուն, Գերյ.
և Գերպտ. Վարդապետներու, Արժանապատիւ քահանաներու, սարկաւագներու և Զմմառու զոյգ դպրեվանքերու
սաներուն: Հանդիպումին մաս կազմեցին մտածական աղօթքը, ապա հոգեւոր պատգամներ, զորս կատարեցին
Գեր. Հ. Սեպուհ Վրդ. Կարապետեան, Գեր. Հ. Մաշտոց Վրդ. Զահթէրեան և Գեր. Հ. Ղազար Վրդ.
Պետրոսեան, որոնք խորհրդածեցին Երան. Մալոյեանի կեանքին դրուագներուն վրայ, դրուատեցին
անոր առաքինութիւնները՝ հաւատքի, յոյսի և սիրոյ, ինչպէս նաեւ անոր ջերմեռանդութիւնը հանդէպ
Յիսուսի Ս. Սրտին և Աստուածամօր Ս. Վարդարանի բարեպաշտութիւնը: Հուսկ գովեցին Երանելիին
քաջաբար նահատակութիւնը: Որմէ ետք Երան. Մալոյեանի իննօրեայ ջերմեռանդութեան փակումը
կատարուեցաւ Ս. Հաղորդութեան օրհնութեամբ: Եղբայրական ագապով վերջ գտաւ այս շինիչ և հոգեպարար
եղբայրական հանդիպումը:
| All the contents on this site are copyrighted ©. |