astrowatch.net կայքէջը` իր տեղեկութիւնը քաղելով «ՌԻԱ-Նովոսթի»-էն, կը հաղորդէ, որ Հայաստանի
կառավարութենէն պաշտօնատար մը ուրբաթ օր յայտնած է, որ Հայաստան իր սեփական արբանեակը
ծիրի վրայ պիտի դնէ: Փոխադրամիջոցներու եւ հաղորդակցութեանց նախարարութեան բարձրաստիճան
պաշտօնատարներէն Գագիկ Գրիգորեան յայտնած է, որ «Արմքոզմոս» անունով նորաստեղծ ընկերութիւն
մը ներկայիս աշխուժօրէն կ՛աշխատի նշեալ արբանեակին համար ծիրի մը արձանագրութեան համար:
Գրիգորեան «Ազատութիւն» ձայնասփիւռի կայանի հայկական ծառայութեան յայտնած է, որ Հայաստանի
անջրպետային ծրագիրը կ՛արժէ 250 միլիոն տոլար, եւ այդ գումարին մէկ բաժինը պիտի հոգան
սեփական ներդրողներ: Պաշտօնատարը արբանեակի արձակման վերաբերեալ որոշ թուական մը չէ
նշած եւ «Արմսաթ» կոչուելիք արբանեակի ծառայութեան բնոյթին մասին տեղեկութիւն չէ փոխանցած:
Ան բաւարարուած է նշելով, որ անիկա պիտի օգտագործուի առեւտրական գետնի վրայ: Հայաստան
ներկայիս հաղորդակցութեան արբանեակներու համար երկու ծիրի դիրքերու իրաւունք ունի: Նախկին
խորհրդային 15 հանրապետութիւններէն վեցը արդէն իրենց արբանեակները ծիրի վրայ դրած են:
Անոնց շարքին է Ազրպէյճան, որ փետրուարին «Ազերսփէյս-1» անունով հաղորդակցութեան իր առաջին
արբանեակը ծիրի վրայ դրաւ: